Փաստ ինֆո

ԱԺ նախագահ Արարատ Միրզոյանն այսօր անդրադարձել է ‹‹Փաստինֆո›› լրատվականի հրապարակմանը նրա ամերիկյան այցի մասին։
Հիշեցնենք, որ ՀՀ ԱԺ նախագահ Արարատ Միրզոյանի գլխավորած պատվիրակությունը աշխատանքային այցով 12 օր գտնվել է Ամերիկայի Միացյալ Նահանգներում, որից 4 օրը հայտնի չէ, թե որտեղ է նա գտնվել, որ նահանգում։

ԱԺ նախագահ Արարատ Միրզոյանի գտնվելու վայրը ԱՄՆ-ում 4-5 օր եղել է անհայտ

Այսպես՝ հուլիսի 12-ին ՀՀ ԱԺ լրատվական ծառայությունը պաշտոնական հաղորդագրություն էր տարածել, որ ՀՀ ԱԺ նախագահ Արարատ Միրզոյանի գլխավորած պատվիրակությունը հուլիսի 14-18-ն աշխատանքային այցով կգտնվի Վաշինգտոնում, հուլիսի 19-21-ը՝ Բոստոնում, իսկ հուլիսի 25-26-ը՝ Նյու Յորքում:

«Փաստինֆո»-ն հարց էր բարձրացրել, թե որտեղ է գտնվել երկրիս ԱԺ նախագահը Բոստոնից-Նյու Յորք ընկած հատվածում՝ հուլիսի 21-25-ը, քանի որ այդ մասին պաշտոնական հաղորդագրության մեջ ոչինչ նշված չէր։

Ի պատասխան մեր հրապարակման՝ Արարատ Միրզոյանը հայտարարել է, թե նախքան Բոստոնից Նյու Յորք գնալը գտնվել է արձակուրդում։ Շատ բարի, ողջունելի է, որ Ա.Միրզոյանը հարկ է համարել պարզաբանմամբ հանդես գալ, բայց ուզում ենք տեղեկացնել հարգարժան պաշտոնյային, որ նրա՝ ԱՄՆ-ում արձակուրդ անցկացնելու մասին ԱԺ-ն պաշտոնական որեւէ տեղեկատվություն չէր տրամադրել։ Ավելին՝ նշել էր, որ Արարատ Միրզոյանը ԱՄՆ է մեկնել աշխատանքային այցով, հիմա պարզվում է, որ այն ուղեկցվել է նաեւ արձակուրդով։

Երկրորդ՝ փաստել էինք, որ երեք օր Բոստոնում գտնվելու օրերին նա ընդամենը երեք միջոցառման է մասնակցել՝ հանդիպում հայ համայնքի հետ, այցելություն «Հայրենիք» կենտրոն, եւ Բոստոնի Հայոց մեծ եղեռնին նվիրված հուշակոթող՝ ծաղիկներ խոնարհելու։ Ինֆորմացիայի աղբյուրը՝ ԱԺ լրատվական ծառայության տարածած հաղորդագրությունն է։

Արձագանքելով մեր հրապարակմանը՝ ԱԺ նախագահը նշել է, թե Բոստոնում ՀՀ փոխվարչապետի հետ հանդիպում է ունեցել նաեւ 20-ից ավել գործարարների եւ տարբեր հասարակական կազմակերպությունների հետ։ Հավատում ենք, եւ հրապարակման մեջ նշել ենք, որ հայ համայնքի հետ հանդիպում ունեցել է, իսկ եթե պարոն Միրզոյանի հրապարակածը այլ ձեւաչափի հանդիպման է վերաբերում, ապա փաստենք, որ այդ մասին տեղեկատվություն չի տարածվել։ Փաստորեն՝ ԱԺ նախագահի աշխատանքային այցերի մասին ԱԺ-ի տարածած տեղեկատվությանը ապավինել չի կարելի ։ Եթե անգամ ԱԺ նախագահի այցերը պատշաճ չեն լուսաբանվում, ինչպես կարող եք վստահել այլ միջոցառումների վերաբերյալ տարածված տեղեկատվության հավաստիությանը։

Եւ, վերջապես, երրորդ՝ հուլիսի 12-ին ԱԺ-ն տեղեկացրել էր, որ հուլիսի 25-26-ը Ա.Միրզոյանը գտնվելու է Նյու Յորքում, սակայն հետագայում նրա Նյու Յորքյան այցելության մասին որեւէ տեղեկատվություն չի տրամադրվել։ Ինչպես արդեն փաստել ենք՝ հուլիսի 22-ից հետո ընդհանրապես Ա.Միրզոյանի՝ ԱՄՆ-ում գտնվելու կամ ունեցած հանդիպումների մասին որեւէ լուր ԱԺ կայքում չի տեղադրվել, չի տարածվել, ինչն էլ արձանագրել էինք։

Բայց մեր հրապարակմանն ի պատասխան Արարատ Միրզոյանը տեղեկացնում է, որ աշխատանքային այցով Նյու Յորքում գտնվելու ընթացքում ընթրել է հայ գործչի հետ։ «Նյու Յորք գնացել եմ հուլիսի 25-ին, այդ օրը ունեցել եմ մեկ շատ կարևոր աշխատանքային ընթրիք մի հայազգի գործչի հետ՝ հայաստանյան և համահայկական օրակարգով։ Գերադասել ենք առայժմ մանրամասները չհրապարակել։ Հաջորդ օրը վերադարձել եմ Հայաստան»,- նշում է Արարատ Միրզոյանը։

Ինչ վերաբերում է ԱԺ նախագահի թույլ տված որակումներին, ապա դրանց հարկ չենք համարում անդրադառնալ, քանզի անհերքելի իրողություն է, որ պիտակավորումների դիմում են, երբ բացակայում են փաստերը, իսկ մենք փաստերի պակաս չունենք, որոնք ավելի քան խոսուն են։ Պարզապես հիշեցնենք հարգարժան Արարատ Միրզոյանին, որ նա բարձրաստիճան պաշտոնյա է՝ խորհրդարանական հանրապետության խորհրդարանի ղեկավարը, հետեւապես պարզապես պարտավոր է ապահովել իր այցերի, հանդիպումների մասին պատշաճ տեղեկատվություն տրամադրումը, հաշվետվողականությունը։

Հեղինակ` Սոնա Գևորգյան