Փաստ ինֆո

Սպանության փորձի գործով տուժող, գործարար Մելիք Մանուկյանի եղբոր, «Սամ-Հար» ՍՊԸ-ի տնօրեն Ռոբերտ Մանուկյանին կալանավորելու դատարանի որոշումը փաստաբանը բողոքարկել է։ Այս մասին «Փաստինֆո»-ն տեղեկացավ գործարարի փաստաբան Հովսեփ Սարգսյանից։ Վերջինս հավելեց, որ դատարան են ներկայացրել նաև գրավի միջնորդություն։

Փաստաբանի խոսքով՝ առաջադրված մեղադրանքը միջին ծանրության հանցագործություն է, որի համար մարդկանց չեն կալանավորում։ Բացի այդ ՝օրենսդիրը պահանջում է, որպեսզի դատարանը պատճառաբանի՝ ինչու է բացառիկ միջոց կիրառում կալանավորումը։ Փաստաբանը պնդում է՝ պատճառաբանությունը պետք է լինի հիմնավոր, մինչդեռ դատարանը նմանատիպ որևէ պատճառաբանություն չի ներկայացրել։ Հովսեփ Սարգսյանը գտնում է, որ 38-332-րդ հոդվածով կալանավորում կիրառելն արդարացված չէ։

«Դատարանն, իհարկե, պատճառաբանություն ներկայացրել է, սակայն դա այն չէ, որը կարող է կալանավորման հիմքում ընկած լինել։ Կալանավորման հիմքում դրված երևույթը դատարանը պատճառաբանել է մի հեռախոսազրույցի պատմությամբ։ Երբ ոստիկանության աշխատակիցը բռնություն է կիրառել Ռոբերտ Մանուկյանի նկատմամբ և սպառնացել նրա ընտանիքին, վերջինս զանգել և ասել է, որ ինքն ու իր ընտանիքը տանն են, թող ասեն իրենց սպառնալիքները», - ասաց Հովսեփ Սարգսյանը՝ ավելացնելով, որ այս հեռախոսազրույցը որպես խոչընդոտող հանգամանք դիտարկելը ողջամիտ չէ և որևէ կերպ չի տեղավորվում տրամաբանության մեջ։

Հիշեցնենք, որ Ռոբերտ Մանուկյանին մեղադրանք էր առաջադրվել իշխանության ներկայացուցչի նկատմամբ բռնություն գործադրելու համար՝ ՀՀ քրեական օրենսգրքի 316-րդ հոդվածի 1-ին մասով եւ քննությանը խոչընդոտելու դրդչության համար՝ ՀՀ քրեական օրենսգրքի 38-332-րդ հոդվածի 2-րդ մասով։ Քննչական կոմիտեն միջնորդություն էր ներկայացրել դատարան՝ Ռոբերտ Մանուկյանի նկատմամբ որպես խափանման միջոց կալանավորումն ընտրելու համար։ Նշենք, որ մինչ այդ նրա ձերբակալումը Կոտայքի մարզի ընդհանուր իրավասության դատարանը ոչ իրավաչափ էր համարել ու նրան անհապաղ արգելանքից ազատելու որոշում կայացրել։

«Դատարանում քննիչի կողմից տրված պարզաբանումներով հիմնավորվել է, որ գործը վարույթ ընդունելուց քննիչի կողմից որեւէ հանձնարարություն չի տրվել կասկածյալին վարույթն իրականացնող մարմին ներկայացնելու համար, գործում չկա բերման ենթարկելու մասին որոշում կամ ծանուցագիր»,- արձանագրել էր դատարանը՝ օգոստոսի 4-ի որոշմամբ։

Ի դեպ, Ռ.Մանուկյանի նկատմամբ նշանակված դատաբժշկական փորձաքննությամբ հաստատվել է բռնության հանգամանքը։ Եզրակացությամբ փորձագետները Ռոբերտ Մանուկյանի մոտ ախտորոշել են կրծքավանդակի հետին պատի սալջարդ, վերին վերջույթների, գլխի փափուկ հյուսվածքների սալջարդեր։

Հեղինակ` Հասմիկ Կոշկարյան