Փաստ ինֆո

ԱԺ «Լուսավոր Հայաստան» խմբակցության պատգամավոր Տարոն Սիմոնյանը երիտասարդների օրվա առթիվ խնդրանք-հորդոր է հղել բոլոր երիտասարդներին։ Այս մասին նա գրել է իր ֆեյսբուքյան էջում.

«Այսօր երիտասարդության միջազգային օրն է։ Այս տարի այն նշում ենք Վանաձորում ՝ իմ ծննդավայրում։ Եվ որպես հոգով մշտապես երիտասարդ՝ խնդրանք֊հորդրոս բոլոր երիտասարդներին.

1. Սովորեք ճանաչել աշխարհը և ձեզ` այդ աշխարհում։

2. Սովորեք բացահայտել և նվաճել աշխարհը և ձեզ` այդ աշխարհում։

3. Սովորեք հաղթահարել ինքներդ ձեզ, որպեսզի աշխարհն ու հորիզոնն ավելի ընդարձակվեն։

4. Խուսափեք կյանքում նվերներից. դրանք հաճախ ծուղակ են ձեր հոգին փոքրացնելու համար։ Հիշեք, որ ոչ մի նվեր ձերը չի, իսկ նվաճածն ամբողջությամբ ձերն է։

5. Ամեն գնով հրաժարվեք անաշխատ եկամուտներից. դրանք ոչնչացնում են մարդու ոգին։

6. Զարգացրեք ինքնուրույն մտածողությունը և հեռու պահեք ձեզնից հարմար մտքերն ու գաղափարները. դրանք ունակ են սնել ստրկամտությունը։

7. Ընդունեք մարտահրավերներն ու հաղթահարեք դրանք։ Այդկերպ դուք կերտում եք սեփական անհատականությունը, որը կարող է ուղենիշ լինել մյուսների համար։

8. Սիրեք ձեր հայրենիքը, ավելացրեք նրա հնարավորություններն ու ուժը։

9. Չտարվեք ընթացիկ պայմանականություններով՝ պաշտոնով, կոչումով, դերով. դրանք միջոց են այլոց օգտակար լինելու համար, այլ ոչ բարձունք, որտեղից փոքր են երևում մյուսները։

10. Մշտապես հիշեք, որ նրանք են արժանի այս կյանքում հաջողության, ովքեր՝

- խնդրի առջև կանգնում են հպարտ, չեն ընկճվում խոչընդոտներից, այլ հզորանում են դրանք հաղթահարելու ներքին կամքով,

- գիտելիքի մեջ տեսնում են հնարավորություն, չեն հիասթափվում տգետների թվացյալ հաջողություններից, այլ բոցավառվում են լույսի գեթ մեկ փայլատակումով,

- իրենցում փնտրում են անհատականության, չեն երկնչում ինքնաքննադատությունից, այլ իմաստանում են հայտնաբերված ԱՌԱՔԵԼՈՒԹՅԱՄԲ:

Աղբյուր` Փաստինֆո