Փաստ ինֆո

«Իրավական տեսանկյունից այդ ամենն անգամ մեկնաբանման ենթակա չէ: Ակնհայտ է, որ գործ ունենք հետեւյալ իրավիճակի հետ. Սահմանադրական դատարանում կան անդամներ, որոնք ձեռնտու չեն գործող իշխանությանը եւ փորձ է արվում որեւէ կերպ նրանցից ձերբազատվել»,- «Փաստինֆո»-ի հետ զրույցում ասաց փաստաբան Երվանդ Վարոսյանը՝ անդրադառնալով Արդարադատության նախարարության կողմից հրապարակված նախագծին, որով նախատեսվում է փոփոխություններ կատարել «Սահմանադրական դատարանի մասին» և «Դատական օրենսգիրք» սահմանադրական օրենքներում:

Հիշեցնենք, որ այդ փոփոխության համաձայն` օգոստոսի 1-ից մինչև հոկտեմբերի 31-ը հրաժարական ներկայացրած ՍԴ դատավորները մինչև իրենց պաշտոնավարման տարիքը լրանալը պահպանելու են իրենց հրաժարականի պահին ունեցած աշխատավարձը, դրա նկատմամբ սահմանված հավելավճարները և սոցիալական երաշխիքները, իսկ պաշտոնավարման տարիքը լրանալուց հետո ստանալու են օրենքով նախատեսված կենսաթոշակ։

Փաստաբանը վտանգավոր է համարում իշխանության այս մոտեցումը: Նրա խոսքով, այս տրամաբանությամբ վաղը կարող է իրավիճակ ստեղծվել, երբ, օրինակ, իշխանությանը հաճելի չէ որեւէ փաստաբանի գործունեություն: «Վաղը կարող է օրենք ընդունեն, ասեն՝ մենք քեզ կտանք բարձր կենսաթոշակ, ամբողջ կյանքում կապահովենք, դու փաստաբանությամբ մի զբաղվիր, հետո՝ լրագրողներին եւ այդպես շարունակ»:

Մեր դիտարկմանը, ստացվում է, սա անցանկալիներին կաշառելով նրանց հետ գործարքի գնա՞լ է, փաստաբանն արձագանքեց. «Կարող ենք այդ բառն էլ օգտագործել բայց կարծում եմ լեզվաբանությունը համապատասխան բառը չի հորինել, որով հնարավոր կլիներ ճիշտ բնորոշել առկա իրողությունները»:
Երվանդ Վարոսյանը ներկայացված նախագծում միայն այս դրույթը չի համարում խնդրահարույց: «Նպատակը եղել է հասարակության ստորին խավերին նախագծի ներկայացման միջոցով հրամցնել, որ տեսեք, մենք խոստացված բարեփոխումների, վեթինգի վերաբերյալ քայլեր ենք ձեռնարկում, բայց այս ՝ ոչինչ չասող նախագծում տեղ են գտել կարգավորումներ, որոնք շատ ավելի վտանգավոր են ու այժմեական խնդիրներ են լուծում»,-շեշտում է փաստաբանը:

Նա վտանգավոր է համարում քաղհասարակության ինչ-ինչ ներկայացուցիչներին, այսպես ասած, դատավորների էթիկայի հանձնաժողով խցկելու փորձերը.«Թե ովքեր են այսօր այդ այսպես կոչված քաղհասարակության ներկայացուցիչները, ինչ են իրենցից ներկայացնում եւ ինչ աստիճանի են մերձ՝ գործող իշխանությունների հետ, որեւէ մեկի համար գաղտնիք չէ: Նման պայմաններում վտանգ ունենք հերթական անգամ դատական համակարգի անկախությունը սահմանափակելու»:

Բացի այս, նախագիծն առաջարկում է իջեցնել դատավորների տարիքային ցենզը՝ 28-ի փոխարեն դարձնելով 25: Երվանդ Վարոսյանը հարցնում է.«Ինչո՞ւ են իջեցնում 25-ի, ինչո՞ւ ոչ 10 տարեկանի, 10 տարեկան երեխաները ավելի մաքուր են դեռ անարատ են, չեն հասցրել շփվել կյանքի դաժան ելեւէջների հետ, գուցե նրանք ավելի լա՞վ իրականացնեն արդարադատությունը»:

Փաստաբանի կարծիքով, իրականում, ամենայն հավանականությամբ իշխանամերձ շրջանակներում կան մարդիկ, որոնց ցանկանում են դատավոր նշանակել, բայց նրանք տարիքային ցենզը չեն բավարարում, հետեւաբար օրենքն են փոխում: «Արդյունքում, արդարադատություն պետք է իրականացնեն կյանքից ոչինչ չհասկացող երեխաները, որոնք 10-15 տարի կաշխատեն, կսովորեն, մինչեւ 2050 թվականը հաստատ սովորած կլինեն»

Փաստաբան Երվանդ Վարոսյանը նաեւ չի կարծում, որ նախագծի հանրային քննարկման ընթացքում իշխանությունը լուրջ ուշադրություն է դարձնելու հնչող քննադատություններին, մյուս կողմից, ըստ փաստաբանի որակական առումով ներկայացված նախագիծն այնպիսին է, որ անգամ քննարկելու բան չկա:

Աղբյուր` Փաստինֆո