Փաստ ինֆո

«Նախագծին ամբողջությամբ ծանոթ չեմ, միայն մամուլի հրապարակումներով եմ հասցրել ծանոթանալ, բայց ինձ խիստ զայրացրել են «Սահմանադրական դատարանի մասին» սահմանադրական օրենքում նախատեսվող փոփոխությունները, քանի որ դրանք չեն հետապնդում այն իրական նպատակը, որը բնորոշ է օրենսդրական փոփոխության կարևորությանը», -«Փաստինֆո»-ի հետ  զրույցում այս կարծիքը հայտնեց փաստաբան Էրիկ Ալեքսանյանը` անդրադառնալով Արդարադատության նախարարության կողմից օրենսդրական այն նախագծին, որով նախատեսվում է փոփոխություններ կատարել «Սահմանադրական դատարանի մասին» և «Դատական օրենսգիրք» սահմանադրական օրենքներում:

«Այս նախագիծը, մասնավորապես` այն կետը, որը սահմանում է ՍԴ դատավորի հրաժարականի մասին համապատասխան դրույթներ, առաջ է բերվում այն պարզ պատճառով, որ ՍԴ ներկա անդամներն իրենց պաշտոնը ստանձնել են նախորդ իշխանությունների օրոք։ Եվ սա ուղղակի ենթադրություն չէ. նման եզրահանգման հիմք է հանդիսանում այսօրվա իշխանության այն հայտարարությունները, որ ՍԴ անդամները անհամատեղելի են այսօրվա Հայաստանի հետ, այսինքն` նման ձևով փորձ է արվում ազատվել ՍԴ այն անդամներից, որոնք ընտրվել են նախորդ իշխանության օրոք»,-ասաց նա։

Հիշեցնենք, որ այդ փոփոխության համաձայն` օգոստոսի 1-ից մինչև հոկտեմբերի 31-ը հրաժարական ներկայացրած ՍԴ դատավորները մինչև իրենց պաշտոնավարման տարիքը լրանալը պահպանելու են իրենց հրաժարականի պահին ունեցած աշխատավարձը, դրա նկատմամբ սահմանված հավելավճարները և սոցիալական երաշխիքները, իսկ պաշտոնավարման տարիքը լրանալուց հետո ստանալու են օրենքով նախատեսված կենսաթոշակ։

Ալեքսանյանի խոսքով` յուրաքանչյուր օրենսդրական փոփոխություն պետք է լինի խիստ անհրաժեշտ առաջին հերթին իրավական համակարգի համար. «Եթե առաջնորդվենք վերոնշյալ տրամաբանությամբ, ապա այդ դեպքում պետք է նույնաբովանդակ նախագիծ առաջարկվի, օրինակ, նաև «Դատախազության մասին» ՀՀ օրենքի համար. չէ՞ որ գրեթե բոլոր դատախազները ևս նախորդ իշխանության ժամանակ են ստացել իրենց պաշտոնը, հետևաբար նրանք նույնպես պետք է տեղ չունենան նոր Հայաստանում»։

Փաստաբանի կարծիքով` նման անհրաժեշտությունը կլինի արդարացված, եթե այն հետապնդի ազնիվ և իրավաչափ նպատակ։

Աղբյուր` Փաստինֆո