Փաստ ինֆո

Երեւանի ավագանիում քննարկվում է մանկապարտեզների վերանորոգման համար 2019 թվականի համար նախատեսված գումարից 91 միլիոն դրամի կրճատման հարցը. գումարը կուղղվի աղբամանների ձեռք բերմանը։
«Չէի՞նք կարող կրճատումներ անել պարգևավճարներից, գործուղումներից և այլ տեղերից։ Ինչու՞ պետք է կրճատում անենք մեր երեխաների հաշվին»,-  Երևանի ավագանու արտահերթ նիստում այսպես արձագանքեց հարցին «Բարգավաճ Հայաստան» խմբակցության ղեկավար Միքայել Մանրիկյանը։  Փոխքաղաքապետ Հայկ Սարգսյանի ներկայացրած վերոնշյալ նախագծով առաջարկվում է մանկապարտեզների վերակառուցման գումարից որոշ չափ հատկացնել աղբահանության տեխնիկայի ձեռքբերման համար։
Հայկ Սարգսյանը վստահեցրեց, որ որևէ մանկապարտեզի վերակառուցում չի տուժի գումարի այս տեղափոխության ժամանակ։ Ավագանու նիստը նախագահող փոխքաղաքապետ Հրաչյա Սարգսյանն էլ գումարի տեղափոխումը կապեց մանկապարտեզների նախագծա-նախահաշվային փաստաթղթերի, հաշվարկների ուշ պատրաստ լինելու հետ։
«Մինչև դեկտեմբեր հնարավորություն չենք ունենա նախատեսված ամբողջ մանկապարտեզների վերանորոգումն իրականացնել։ Դա է պատճառը, որ այդտեղից այդ գումարի չափով հատկացրել ենք, որ ձեռք բերենք աղբահանության տեխնիկա», - ասաց Հրաչյա Սարգսյանը։
Հայկ Սարգսյանն էլ հավելեց, որ դա չի նշանակում, որ 91 միլիոնի տեղափոխման հետևանքով որևէ մանկապարտեզ դուրս կգա այն ցուցակից, որոնք ծրագրված են եղել վերանորոգել. «Այս 91 միլիոնն այն ավել գումարի մասն է, որը պետք է սպասի մինչև այդ մանկապարտեզների նախահաշիվները պատրաստ լինեն, տեղադրվեն, կազմակերպվեն մրցույթները, որն այս տարվա ընթացքում չենք հասնի իրականացնել։ Այս գումարը նույնիսկ, եթե մնա, տարեվերջին հանդես է գալու որպես տնտեսում։ Ուստի որոշել ենք տեխնիկա ձեռք բերելու համար տեղափոխություն անել այն հոդվածից, որտեղ տարեվերջին տնտեսումը շատ է», - հավելեց Հայկ Սարգսյանը։
Ի դեպ, Երևանի ավագանու արտահերթ նիստը նախագահում է փոխքաղաքապետ Հրաչյա Սարգսյանը։ «Լույս» խմբակցության ղեկավար Դավիթ Խաժակյանը փորձեց տեղեկանալ՝ որն է քաղաքապետ Հայկ Մարությանի բացակայության պատճառը։ Հրաչյա Սարգսյանն ասաց, որ արտառոց բան չի պատահել, պարզապես քաղաքապետը փոքր-ինչ վատառողջ է։

Աղբյուր` Փաստինֆո