Փաստ ինֆո

BBC-ի՝ «Մարտի 1»-ի գործի վերաբերյալ հրապարակմանը պետք է իրավական ընթացակարգ տրվի, նյութերի նախապատրաստում իրականացվի և քրեական գործ հարուցվի: «Փաստինֆո»-ի հետ զրույցում ասաց «Իրավական ուղի» ՀԿ-ի համահիմնադիր, Արցախի նախկին ՄԻՊ Ռուբեն Մելիքյանը։

Հիշեցնենք, որ BBC ռուսական ծառայությունում օգոստոսի 7-ին հրապարակվել էր հոդված, որում նշվել էր, որ արցախյան ուժայինները 2008թ.-ի մարտի 1-ին Երեւանում կրակել են ցուցարարների ուղղությամբ։ Ըստ հոդվածի՝ ցուցարարների ուղղությամբ կրակ բացելու գործողությունը ղեկավարել է Արցախի գեներալ-մայոր Սամվել Կարապետյանը (Օգանովսկին)։

«Մենք ունենք շատ լուրջ լրատվականի կողմից պնդում, որ նա ունի էքսկլյուզիվ մատչելիություն՝ Հայաստանում քննվող՝ ադքան մեծ հնչեղություն ունեցող քրեական գործի նյութերին: Կարծում եմ, քրեական դատավարության շրջանակներում պետք է իրականացվի նյութերի նախապատրաստում և արդյունքում քրեական գործ հարուցվի նախաքննական գաղտնիք հրապարակելու փաստի առթիվ կամ քրեական գործի հարուցումը մերժվի, ինչից կարելի է հետևություն անել, որ որևէ նախաքննական գաղտնիք կազմող տեղեկություն այդ հրապարակումը չէր պարունակում, հետևաբար նաև չկար էքսկլյուզիվ մատչելիություն մեր նախաքննության նյութերին»,-«Փաստինֆո»-ի հետ զրույցում ասաց Մելիքյանը:

Նա նշեց, որ քրեական գործի հարուցումը կվկայի այն մասին, որ BBC-ն ճիշտ է և ունի էքսկլյուզիվ նյութեր, իսկ եթե այդպիսիք չկան, ապա նյութերի նախապատրաստման արդյունքում քրեական գործի հարուցումը կմերժվի:

«Ամեն դեպքում մեզ անհրաժեշտ է իրավական հետևանքներ առաջացնող պաշտոնական պատասխան, որ իրականացվել է քննություն, որի արդյունքում պարզվել է՝ որևէ նախաքննական գաղտնիք պարունակող տվյալներ այնտեղ չկան: Սա անհրաժեշտ է, քանի որ բազմաթիվ շահարկումներ են սկսվել այս հրապարակման առթիվ, էլ չասեմ, որ այն հարված է Արցախի պաշտպանության բանակի նախկին հրամանատարին, Արցախի հերոսին, մի մարդու, որը մեծ հեղինակություն ունի ու մեծ ներդրում է ունեցել մեր համազգային պայքարում: Այս հրապարակմամբ արատավորվում է նրա անունը»,-նշեց «Իրավական ուղի» ՀԿ համահիմնադիրը:

Հարցին, հնարավո՞ր է մարտի 1-ի գործով ինֆորմացիան BBC-ին տրամադրվել է վարչապետի նշած դավադիր ուժերի կողմից, որպեսզի լարվածություն մտցվի Հայաստան-Արցախ հարաբերություններում, Մելիքյանը պատասխանեց.

«Ես այդ դավադրություններ, դավադիր ուժեր տերմինաբանության մեծ ջատագովը չեմ, սակայն վտանգ կա, որ այս խոսքերը կարող են չարաշահել և ավելի վատ հետևանքներ ունենալ: Այդ տերմինաբանությունը չեմ օգտագործի, միայն կասեմ` մտահոգիչ է, որ այդ հրապարակման մեջ ուղիղ թիրախավորվում է կոնկրետ անձ, որը մեր 90-ական թվականների համազգային հաղթանակի խորհրդանիշներից մեկն է»,-ասաց Ռուբեն Մելիքյանը:

Հեղինակ` Սոնա Գեւորգյան