Փաստ ինֆո

ՀՀ արդարադատության նախարարությունը փորձում է կյանքի կոչել ՍԴ դատավոր Վահե Գրիգորյանի առաջարկը՝ ՍԴ դատավորների հրաժարականի համար պայմաններ ստեղծելով։

Կառավարությունը մշակել ու շրջանառության մեջ է դրել «Սահմանադրական դատարանի մասին» ՀՀ սահմանադրական օրենքում փոփոխություններ ու լրացումներ կատարելու մասին օրենքի նախագիծ, որով փորձում են «գայթակղել» ՍԴ դատավորներին՝ ինքնակամ հրաժարական ներկայացնել։

Այսպես՝ օրինագծով կառավարությունն առաջարկում է՝ 2019 թվականի օգոստոսի 1-ից մինչև հոկտեմբերի 31-ը հրաժարական ներկայացրած Սահմանադրական դատարանի դատավորի նկատմամբ անկախ տարիքից պահպանել իր հրաժարականի պահին ունեցած աշխատավարձը, դրա նկատմամբ սահմանված հավելավճարները և սոցիալական երաշխիքները, մինչև իր պաշտոնավարման տարիքը լրանալը, բացառությամբ նրա կողմից հանրային ծառայության անցնելու դեպքի։

Նշենք, որ այսօրինակ երաշխիքների մասին առաջինը խոսել է ՍԴ նորընտիր դատավոր եւ ինքն իրեն ՍԴ նախագահ հռչակած Վահե Գրիգորյանը, որը փորձում է հասնել ՍԴ նախագահ Հրայր Թովմասյանի եւ ՍԴ մի շարք դատավորների հրաժարականին։ Վ.Գրիգորյանը մասնավորապես իր հայտնի նամակում առաջարկել էր, որ «օրենսդիր իշխանությունը նախատեսի վաղ կենսաթոշակային սխեմայի գործարկումը Դատարանի անդամների համար բոլոր երաշխիքներով, հաշվի առնելով այս տեսակի հանգուցալուծումների համար միջազգային լավագույն փորձը և մշակված ստանդարտները, որ հրաժարական ներկայացրած անդամներն ստանան իրենց կողմից ստացվող աշխատավարձին առնվազն հավասար կենսաթոշակ և օգտվեն այլ երաշխիքներից, եթե կորոշեն հրաժարական ներկայացնել իրենց զբաղեցրած պաշտոններից»:

Աղբյուր` Փաստինֆո