Փաստ ինֆո

Երևանի ավագանու նախկին անդամ  Սոնա Աղեկյանն  ավելն ու կանացի զգեստը ձեռքին քաղաքապետարանի դիմաց ակցիա է  իրականացնում:

Նրա խոսքով, ակցիայի նպատակը ցույց տալն է, որ քաղաքային իշխանություններն ոչ միայն չեն աշխատում, այլև  խաբում են  քաղաքացիներին:

‹‹Երևանի քաղաքապետ Հայկ Մարությանը մեզ խոստանում էր, որ գալու է և մաքրելու է Երևանը: Մենք արձանագրեցինք՝ որ Երևանն աննախադեպ կեղտի մեջ շաղախված է և գարշահոտություն է տիրում: Մարդիկ դրանից հիվանդանում են ու անընդհատ շտապօգնության մեքենաներով գնում են ինֆեկցիոն հիվանդանոցներ››,-լրագրողների հետ զրույցում ասաց Աղեկյանը:

Ավագանու նախկին անդամը նշեց, որ  երբ իրենք բարձրաձայնում են առկա խնդիրները, քաղաքապետարանը մտնում է ջայլամի քաղաքականության մեջ:

‹‹Տեսաուղերձով հարցեր էինք ուղարկել, որոնց քաղաքապետը վախեցավ պատասխանել, քանի որ չուներ  այդքան համարձակություն: Դրանից հետո դիմումով, ուղիղ եթերով եկանք ու պատշաճ կարգով Երևանի քաղաքապետին հարցեր ուղարկեցին, պարզելու համար՝ ինչու՞ է Երևանում ձախողվել աղբահանությունն ու սանմաքրումը: Մենք նաև նշեցինք, որ այդ խնչող խոսնակն, ով խնչած ունի քաղաքացիների վրա, դուք նրան գրավոր նկատողություն տվե՞լ եք››,-ասաց Աղեկյանը:

Հիշեցնենք, որ Երևանի ավագանու հունիսի 26-ի նիստում քաղաքապետ Հայկ Մարությանը առաջարկել էր երթեւեկության առավելագույն արագությունը 60 կմ/ժ-ից իջեցնել 50 կմ/ժ-ի։

Այս առաջարկը բուռն քննարկվեց հատկապես սոցիալական ցանցերում, եւ ահա այդպիսի մի քննարկման ժամանակ օգտատերերից մեկի գրառմանը Երևանի քաղաքապետի մամուլի քարտուղար Հակոբ Կարապետյանն արձագանքել է․ «Ինչի՞ մասին ենք վիճում ընդհանրապես: Ներեցեք, բայց խնչած ունեմ խցանման ու մյուս պրոբլեմների վրա տասը կմ/ժ-ով նվազեցնելը մարդկանց կյանքեր է փրկում»: 

Աղեկյանն ընդգծեց, որ քաղաքապետարանից իր նամակին այդպես էլ չեն պատասխանել:

‹‹Հիմա սիմվոլիկ ձևով զգուշացնում ենք, որ քաղաքապետը խաբելու համար և՛ իրավական տիրույթում է պատասխանատվության կանչվելու, և՛ հագնելու է կանացի զգեստ, շրջելու է Երևան քաղաքում››,-նշեց ավագանու նախկին անդամը:

Մանրամասներն՝ տեսայութում.

Հեղինակ` Սոնա Գեւորգյան