Փաստ ինֆո

Երևանի ընդհանուր իրավասության դատարանի Կենտրոն և Նորք Մարաշ նստավայրում դատավոր Տաթևիկ Գրիգորյանի նախագահությամբ շարունավում է կաշառքի մեջ մեղադրվող դատավոր Գագիկ Հեբոյանի և փաստաբան Վահագն Դանիելյանի գործով դատական նիստը։

Նշենք, որ նախորդ դատական նիստին Հեբոյանի պաշտպան Արմեն Նադիրյանը միջնորդություն ներակայացրեց դատակոչել Հեբոյանի նիստերի քարտուղար Անժելա Հովսեփյանին՝ պնդելով իր դիրքորոշումն առ այն, որ Անժելա Հովսեփյանի ցուցմունքները կարող են արժեքավոր լինել․ «Թե Բենիկ Հարությունյանի, թե Գագիկ Հեբոյանի ցուցմունքներում նշված իրական հանգամանքները հաստատելու կամ հերքելու առումով նա կարող է տեղեկություններ ունենալ»,-ասաց պաշտպանը։

«Փաստինֆո»-ի հաղորդմամբ՝ այսօրվա դատական նիստին վկա Անժելա Հովսեփյանը հայտարարեց, որ գործով երկու ամբաստանյալներին էլ ճանաչում է, եւ որեւէ թշնամություն կամ բարեկամություն նրանց հետ չունի։ Ինչ վերաբերում է գործով առանցքային վկա Բենիկ Հարությունյանին, Անժելա Հովսեփյանի խոսքով՝ նրան ճանաչում է որպես հայցվոր, ով Եղվարդի դատարանում  գործեր է ունեցել։

ՊատասԽանելով պաշտպանական կողմի հարցերին՝ Անժելա Հովսեփյանն առանձնացրեց 2018 թվականի գործը, որին հենց ինքն է եղել նիստերի քարտուղար․ «Այս գործով դատաքննությունն ավարտվել ենք մարտի 1-ին, իսկ վճռի հրապարակման օր՝  նշանակել մարտի 18-ին, սակայն ծանրաբեռնվածությունից ելնելով՝  հրապարակել ենք ամսի 19-ին»,-ասաց վկան։

Վերջինիս խոսքով՝ բացառված է, որ Գագիկ Հեբոյանը Բենիկ Հարությունյանի հետ առանձին զրույց ունենար․«Հիշում եմ, որ փետրվարի 27-28-ին վճիռներ ունեինք, որ չէինք հրապարակել, երբ այդ նիստի օրը ընդմիջում հայտարարվեց, ուզում էի պրն Հեբոյանին ասել, որ այդ ընթացքում գոնե դրանք հրապարակենք, բայց թեքվեցի, որ ասեմ, նա արդեն այնտեղ չէր, սովորաբար ընդմիջմանը նա անմիջապես դուրս է գալիս»։ Անժելա Հովսեփյանը նշեց, որ նիստերի դահլիճից վերջինն ինքն է դուրս գալիս, եւ կարող է ասել, որ նրանց միջեւ շփում չի եղել։

Վկայի խոսքով՝ վճիռը հանձնելու օրը Բենիկ Հարությունյանը փորձեց ինչ-որ իրավաբանական խորհրդատվության համար դիմել պրն Հեբոյանին, վերջինս էլ ասաց, որ դատավորը խորհրդատվություն տրամադրող մարմին չէ․ «Բենիկ Հարությունյանը միշտ ագրեսիվ է տրամադրված եղել, հատկապես, որ երկու անգամ հայցադիմումը վերադարձրել ենք, իսկ պրն Հեբոյանը, երբ իմանում էր, որ նա պետք է գա, նրա անունը լսելիս ասում էր՝ վերջ, օրս փչացավ, այսինքն՝ նիստից դուրս նա անգամ մի բառ չէր խոսի Բենիկ Հարությունյանի հետ, որովհետեւ ակնհայտ հակակրանք ուներ նրա հանդեպ»։

Ըստ վկայի՝ Բենիկ Հարությունյանը միշտ դատարան մտնելիս ասում էր՝ Հեբոյանն իր ձեռքից խլեց իր ունեցածքը․ «Միշտ ագրեսիվ էր տրամադրված, գալիս էր, նիստերից դուրս պրն Հեբոյանի հետ հանդիպում էր խնդրում, մենք էլ ասում էինք, որ նա չի հանդիպում քաղաքացիների հետ, մի օր էլ անգամ կարգադրիչներից մեկը զանգել էր պրն Հեբոյանին, նա էլ ասել էր՝ ուղարկեք, թող գնա, վճիռն էլ տվեցինք, չպրծանք»։

Ինչ վերաբերում է փաստաբան Վահագն Դանիելյանին, Անժելա Հովսեփյանի խոսքով՝ նրա հետ  նորմալ հարաբերությունների մեջ են։

Վկայի հարցաքննությունից հետո նրան հարցեր հղեց նաեւ մեղադրող դատախազ Արթուր Չախոյանը։ Վերջինս ընդգծեց, որ Հեբոյանի խոսքով՝ այդ գործով դատաքննությունն ավարտվել է ամսի 4-ին, մինչդեռ ինքը՝ Անժելա Հովսեփյանը, նշեց, որ ավարտել են ամսի 1-ին։ Այս առիթվ վկան ասաց․ «Պրն Հեբոյանը գուցե շփոթվել է, չեմ կարող ասել»։

Դատախազը նշեց, որ վկայի ներկայացրածով՝ Գագիկ Հեբոյանը կանխակալ տրամադրվածություն է ունեցել Բենիկ Հարությունյանի նկատմամբ։ Դատախազը հետաքրքրվեց, թե այդ պարագայում ինչու՞ նա ինքնաբացարկ չի հայտնել։ Վկան ասաց, որ այդ հակակրանքը գալիս էր Բենիկ Հարությունյանի ագրեսիվ վարքագծից, կանխակալ տրամադրվածության խնդիրը չկար։

Դատախազի մյուս դիտարկմանը, թե Հեբոյանը նշել է, որ միջանցքում հանդիպել է Բենիկ Հարությունյանի հետ, վկան ասաց, որ դահլիճից դուրս գուցե հանդիպած լինեն, եւ ինքը տեսած չլինի, բայց նիստերի դահլիճում նրանք չեն շփվել։

Վկային հարց հղեց նաեւ նախագահող դատավոր Տաթեւիկ Գրիգորյանը։ Վերջինս հետաքրքրվեց, թե ինչով է պայմանավորված այն հանգամանքը, որ իրենց վարույթում ունենալով մոտ 2000 քաղաքացիական գործ, լինելով այդքան ծանրաբեռնված, վկան մարտի 1-ի նիստն այդքան մանրամասնությամբ հիշում է։ Անժելա Հովսեփյանը, պատասխանելով հարցին, ասաց․«Պայմանավորված է իմ հիշողությամբ․ կան գործեր, որոնք տպավորվում են, որոնք վիճահարույց են»։

Այսպիսով, ավարտվեց դատաքննության փուլը։ Դատարանն անցում կատարաեց դատական վիճաբանությունների փուլին։

Ավելի վաղ «Փաստինֆո»-ն հայտնել է, որ Կոտայքի մարզի ընդհանուր իրավասության դատարանի դատավոր Գագիկ Հեբոյանին մեղադրանք է առաջադրվել առանձնապես խոշոր չափերով կաշառք ստանալու համար՝ ՀՀ քրեական օրենսգրքի 311-րդ հոդվածի 4-րդ մասի 2-րդ և 3-րդ կետերով, իսկ փաստաբան Վահագն Դանիելյանին` դատավորի կողմից առանձնապես խոշոր չափերով կաշառք ստանալուն օժանդակելու համար՝ ՀՀ քրեական օրենսգրքի 38-311-րդ հոդվածի 4-րդ մասի 2-րդ և 3-րդ կետերով:

Նշենք, որ Գ. Հեբոյանի նկատմամբ որպես խափանման միջոց է կիրառվել կալանավորումը, իսկ Վ. Դանիելյանի նկատմամբ որպես խափանման միջոց ընտրված կալանավորումը 08.05.2019թ.-ին փոխարինվել է այլընտրանքային խափանման միջոց գրավով:

Հեղինակ` Միլենա Խաչիկյան