Փաստ ինֆո

Բյուրեղավանի քաղաքապետ Հակոբ Բալասյանի վերաբերյալ նյութերի հիման վրա ՀՀ քննչական կոմիտեում հարուցվել է քրեական գործ։ Այս մասին «Փաստինֆո»-ի հարցմանն ի պատասխան՝ փոխանցեցին Քննչական կոմիտեի տեղեկատվության եւ հասարակայնության հետ կապերի բաժնից։

Քրեական գործը հարուցվել է ՀՀ ՔՕ-ի 311-րդ հոդվածի 1-ին մասով, այն է՝ պաշտոնատար անձի կողմից կաշառք ստանալը։

«Փաստինֆո»-ն արդեն հայտնել է, որ Կոտայքի մարզի ընդհանուր իրավասության դատարանում Բյուրեղավան համայնքի քաղաքային պոլիկլինիկայի նախկին տնօրենի եւ էնդոկրինոլոգ բուժքույրի վերաբերյալ քննվող քրեական գործի շրջանակում ի հայտ են եկել նոր հանգամանքներ. մեղադրյալները դատարանի դահլիճում հայտարարել են, որ ի սկզբանե իրենց առաջադրված մեղադրանքը հիմնված է եղել համայնքային ենթակայությամբ գտնվող պոլիկլինիկայի 4 բուժքույրերի ցուցմունքների վրա, որոնք, նրանց խոսքով, ուղղորդված են եղել Բյուրեղավանի քաղաքապետ Հակոբ Բալասյանի կողմից. «Վերջին երկու դատական նիստերին իմ պաշտպանյալները ցուցմունք տվեցին եւ մեկնաբանեցին, թե ինչով է պայմանավորված իրենց այդ դիրքորոշումը։ Մասնավորապես, Արմեն Մոսիկյանը նշեց, որ 2009 թվականին պոլիկլինիկայի տնօրեն նշանակվելուց հետո առանձնազրույց է ունեցել քաղաքապետի հետ, որի ժամանակ քաղաքապետը նշել է, որ ամեն ամիս իրեն պետք է վճարի 250 հազար դրամ կաշառք, ինչից նա հրաժարվել է։ Դրանից բացի, քաղաքապետը 500 դոլար էլ պահանջել է էնդոկրինոլոգ բժշկուհուց»,- մեզ հետ զրույցում նշել էր մեղադրյալների պաշտպան Վահան Հովհաննիսյանը։

Արմեն Մոսիկյանի ցուցմունքի այն դրվագը, ըստ որի՝ Բյուրեղավան համայնքի ղեկավարը իրենից որպես կաշառք ամսական 250.000 ՀՀ դրամ գումար է պահանջել, ուղարկվել էր Քննչական կոմիտե։ Միաժամանակ Հատուկ քննչական ծառայություն էր ուղարկվել պոլիկլինիկայի բուժքույր, գործով ամբաստանյալ Մարինե Բաղդասարյանի ցուցմունքի այն դրվագը, ըստ որի՝ քննիչը իրեն ստիպել և սպառնացել է վարույթն իրականացնող մարմնին տրամադրել կեղծ տեղեկատվություն Արմեն Մոսիկյանի գործողությունների վերաբերյալ, որը ինքը հրաժարվել է տրամադրել։ Ավելի վաղ Հատուկ Քննչական ծառայության լրատվական բաժնից մեր հարցմանն ի պատասխան տեղեկացրել էին, որ նյութերի նախապատրաստումը շարունակվում է։

Հավելենք, որ մեզ հետ զրույցում քաղաքապետ Հակոբ Բալասյանը հրաժարվել էր պատասխանել հարցերի. «Արված հայտարարությունների վերաբերյալ ես իմ կարծիքն ուղարկել եմ դատարան՝ նշելով, որ դրանք անհիմն են եւ զրպարտություն են։ Ես չեմ ուզում դա մեկնաբանել»,-ասել էր նա։

Հիշեցնենք, որ Բյուրեղավան համայնքի քաղաքային պոլիկլինիկայի նախկին տնօրենի եւ էնդոկրինոլոգ բուժքույրի վերաբերյալ քննվող քրեական գործը դատարանում քննվում է արդեն երկու տարի։ Ըստ նախաքննական մարմնի՝ բուժքույր Մարինե Բաղդասարյանին մեղադրանք է առաջադրվել պոլիկլինիկայի նախկին տնօրեն Արմեն Մոսիկյանի հետ նախնական համաձայնությամբ յուրացման եղանակով հափշտակության կատարելու համար։ Պոլիկլինիկայի տնօրենին մեղադրանք է առաջադրվել նաեւ պաշտոնեական լիազորությունները չարաշահելու համար։

Հեղինակ` Միլենա Խաչիկյան