Փաստ ինֆո

Կոտայքի մարզի ընդհանուր իրավասության դատարանի դատավոր Գագիկ Հեբոյանի պաշտպան Արմեն Նադիրյանը Գլխավոր դատախազին է բողոքարկել Հատուկ քննչական ծառայության այն որոշումը, որով կարճվել էր Հեբոյանի հաղորդման հիման վրա ՀՀ ՔՕ-ի 309–րդ հոդվածի 2–րդ մասի հատկանիշներով հարուցված քրեական գործը։

Հիշեցնենք, որ ըստ պաշտպանական կողմի՝ գործով նախագահող դատավոր Տաթևիկ Գրիգորյանը խախտումներ է թույլ տվել մայիսի 27–ին իր պաշտպանյալի խափանման միջոց կալանավորման հիմնավոր լինել կամ չլինելու հարցի քննությանը. «Ոստիկանները բռնություն գործադրելու միջոցով են իմ պաշտպանյալին տեղափոխել դատարան, որտեղ նա հայտնել է, որ մարմնական վնասվածքներ ունի, դրանք ցույց է տվել նախագահող դատավոր Տաթևիկ Գրիգորյանին և հայտարարել, որ առանց իր պաշտպանների չի կարող մասնակցել դատական նիստի։ Դատավորը թույլ չի տվել Հեբոյանին չմասնակցել նիստին և առանց փաստաբանի որոշում է կայացրել Հեբոյանի խափանման միջոց կալանավորումն ուժի մեջ թողնելու վերաբերյալ»,-դատարանի դահլիճում հայտարարել էր պաշտպան Արմեն Նադիրյանը՝ նշելով, որ իր նկատմամբ բռնություն գործադրելու կապակցությամբ Գագիկ Հեբոյանը հանցագործության մասին հաղորդում է ներկայացրել Հատուկ քննչական ծառայություն, որտեղ ՀՀ ՔՕ 309–րդ հոդվածի 2–րդ մասի հատկանիշներով հարուցվել է քրեական գործ։

«Փաստինֆո»-ի հետ զրույցում Գագիկ Հեբոյանի պաշտպան Արմեն Նադիրյանն ասաց, որ ըստ որոշման՝ ձեռք չի բերվել բավարար ապացույցների համակցություն այն մասին, որ ուղեկցող ոստիկանները իրավաչափ չեն գործել, եւ գտել են, որ նման պայմաններում հանցակազմը բացակայում է. «Բայց պրն Հեբոյանի կողմից բարձրացված խնդիրն այլ էր. արդյո՞ք դատավորի կողմից չի կազմակերպվել կամ հրահանգ իջեցվել կամ խնդրանք եղել, որ պարտադիր, ցանկացած ձեւով նրա մասնակցությունը նիստին ապահովվի։ Այս մասով ընդհանրապես քննություն չկա, եւ բողոքարկման գլխավոր շեշտադրումը դա է»։

Արմեն Նադիրյանն ընդգծեց, որ գոյություն ունի ուղեկցման գործընթացը կարգավորող իրավական ակտ, մասնավորապես՝ Կառավարության որոշմամբ հաստատված կարգ, որը չի ապահովվել. «Այդ ուղղությամբ եւս միջնորդել էինք քննություն կատարել, այսինքն՝ ուղեկցող ոստիկանին, ուղեկցող գումարտակի հրամանատարի առաջ բարձրացնել այդ հարցերը։ Եթե նախատեսվում է, որ ուղեկցման հայտը պետք է ներկայացվի ուղեկցումից երեք օր առաջ, բայց ներկայացվել է հենց այդ օրը, թող պարզեին, թե ինչով է պայմանավորված այդ հրատապությունը, թերհամալրված պահակախմբի ձեւավորումը. պետք է լինեին առնվազն երեք հոգի, բայց կազմվել էր մեկ հոգուց եւ մեկ ոստիկան վարորդից բաղկացած խումբ»։

Նադիրյանը նշեց, որ այդ ուղղությամբ որեւէ քննություն չի տարվել, եւ դրա համար էլ բողոքարկել են Գլխավոր դատախազին, որպեսզի նա ապահովի բազմակողմանի, լրիվ եւ օբյեկտիվ նախաքննության կատարումը։

Ավելի վաղ հայտնել ենք, որ Երեւանի ընդհանուր իրավասության դատարանի Կենտրոն եւ Նորք մարաշ նստավայրում այսօր ավարտվեց կաշառք ստանալու մեջ մեղադրվող դատավոր Գագիկ Հեբոյանի եւ կաշառք ստանալուն օժանդակելու մեջ մեղադրվող փաստաբան Վահագն Դանիելյանի գործով դատաքննությունը։ Մեղադրող դատախազ Արթուր Չախոյանը հանդես եկավ ճառով, ինչից հետո Հեբոյանի պաշտպան Արմեն Նադիրյանը միջնորդեց վերացնել կամ փոփոխել Հեբոյանի նկատմամբ ընտրված խափանման միջոց կալանավորումը։

«Փաստինֆո»-ի հաղորդմամբ՝ խորհրդակցական սենյակից վերադառնալով նախագահող դատավոր Տաթեւիկ Գրիգորյանը որոշեց մերժել ներկայացված միջնորդությունը։

Հաջորդ դատական նիստը նշանակվեց սեպտեմբերի 4-ին՝ ժ. 14։00-ին։

Հեղինակ` Միլենա Խաչիկյան