Փաստ ինֆո

Հուլիս ամսվա ընթացքում ռուսաստանցի զբոսաշրջիկների թվի կրճատման պատճառով Վրաստանի զբոսաշրջության ոլորտում կորուստները կազմել են առնվազն 44,3 միլիոն դոլար: Այս մասին InterpressNews գործակալությանը հայտնել է Վրաստանի զբոսաշրջության ազգային վարչակազմի ղեկավար Մարիամ Կվրիվիշվիլին:

Նա պարզաբանել է, որ խոսքը գնում է 2019 թվականի հուլիս ամսվա և 2018 թվականի նույն ժամանակահատվածի շահույթների համեմատության մասին:

«44,3 միլիոն դոլարն այն նվազագույն տարբերությունն է, որը գրանցվել է փոքր և միջին հյուրանոցների, սրճարանների և ռեստորանների, տուրօպերատորների, տուրիստական ծառայություններ մատուցողների տվյալները համեմատելիս», - ասել է Կվրիվիշվիլին՝ մեկնաբանելով իրավիճակը:

Նախորդ օրը Վրաստանի զբոսաշրջության վարչությունը հրապարակել է տվյալներ, համաձայն որոնց՝ հուլիսին ռուսները 6.4% -ով քիչ այցելություններ են կատարել հանրապետություն՝ համեմատած 2018 թվականի հուլիսի հետ:

Հիշեցնենք, որ Ռուսաստանի և Վրաստանի միջև օդային երթևեկությունը դադարեցվել էր այն բանից հետո, երբ հունիսի 20-ին Թբիլիսիում սկսվել էին հակառուսական գործողություններ: Ռուսաստանցիների անվտանգության սպառնալիքի պատճառով ՌԴ նախագահ Վլադիմիր Պուտինը հուլիսի 8-ից հրամանագրով արգելել է թռիչքները երկրների միջև: Georgian Airways  ընկերությունը արգելքից ստացված վնասը գնահատել է 25 միլիոն դոլար:

Աղբյուր` Փաստինֆո