Փաստ ինֆո

Դատարկ փուչիկների նման մեկ-մեկ պայթում են ՀՔԾ հորինած պատմությունները, կարված գործերը: Արդյունքում՝ փաստն այն է, որ ՀՔԾ-ն մեծ աղմուկից, բազմաթիվ շոուներից հետո խայտառակ կերպով տապալել է մարտի 1-ի քրեական գործի նախաքննությունը:

Այս համատեքստում վերջին ցնցող փաստը Մարտի 1-ի գործով Զաքար Հովհաննիսյանի սպանության մեջ մեղադրվող ոստիկանության զորքերի շտաբի նախկին պետ Գեղամ Պետրոսյանի՝ օգոստոսի 4-ին ազատ  արձակումն էր Երևան-Կենտրոն քրեակատարողական հիմնարկից, քանի որ լրացել է վերջինիս կալանավորման երկամսյա ժամկետը, իսկ նախաքննական մարմինը՝ ՀՔԾ-ն, այդ ժամկետը լրացնելու միջնորդություն չէր ներկայացրել։

«Փաստինֆո»-ի հետ զրույցում փաստաբան Վաղարշակ Գևորգյանը կալանքի միջնորդություն չներկայացնելու վերաբերյալ շեշտել էր, թե՝ «Ապացույցների բավարար զանգված ձեռք չի բերվել, որով կարողանան ապացուցել կամ հիմնավորել, որ այդպիսի դեպք է տեղի ունեցել, որին մասնակից է եղել Գեղամ Պետրոսյանը»։ Իրականում ոչ միայն ապացույցները բավարար չեն եղել նրա կալանավորման համար, հիմա պարզ է դառնում, որ նման դեպք տեղի ունենալու մասին էլ ապացույցներ չկան: Հարց է ծագում՝ ինչու՞ էր ՀՔԾ-ն աղմուկ-աղաղակով, արագ-արագ ձերբակալում, ապա կալանքի տակ պահում ոստիկանության գնդապետին: Վարչապետի մակարդակով էլ գովասանքի արժանացավ՝ թե տեսեք՝ ՀՔԾ-ն ինչ արդյունավետ է գործում:

Հիշեցնենք, որ Գեղամ Պետրոսյանը թեթև հանցանքի մեջ չէր մեղադրվում, նրան մեղադրանք էր առաջադրված ամենածանր հանցագործության՝ մարդուն կյանքից զրկելու համար՝ 2008 թվականի մարտի 1-ին հրազենի գործադրմամբ Զաքար Հովհաննիսյանին սպանելու մեջ: Ընդ որում՝ դիտավորությամբ:

ՀՔԾ տխրահռչակ բացահայտումների մեջ այս մեկն ուղղակի Հատուկ քննչական ծառայության խայտառակությունը կարելի է համարել, որին հետևեց իշխանությունների ոգևորված մեկնաբանությունները, ընդհուպ՝ սա դեռ սկիզբն է 10 սպանությունների բացահայտման մասով, դեռ տեսեք ինչեր են լինելու:

Այդ օրերին ՀՔԾ-ի այդ ցնցող «բացահայտման» ՝ Գեղամ Պետրոսյանի ձերբակալության վերաբերյալ ԱԺ իմքայլական պատգամավոր, փաստահավաք խմբի անդամ, նախկին ՀՀՇ-ական Անդրանիկ Քոչարյանի քաղաքական հայտարարությունը ինքնախոստովանության հանգույն հնչեց: Նա այն ժամանակ հայտարարեց, թե՝ Գեղամ Պետրոսյանի ձերբակալությունը խոսում է այն մասին, որ նախաքննական մարմինը Մարտի 1-ի բացահայտումը չի կապում միայն Ռոբերտ Քոչարյանին մեղադրանք առաջադրելու հետ: Դե իհարկե: Չէ՞ որ հենց այդ օրերին եվրոպական շրջանակներից այդ համատեքստում կասկածներ էին հնչել , ուստի մի թիրախ պիտի գտնվեր, որ Քոչարյանն իր դարակազմիկ հայտարարությունն աներ:

Հարց է ծագում՝ հիմա ի՞նչ է ասելու Անդրանիկ Քոչարյանը:

Արդեն իսկ մասնագիտական շրջանակները համոզմունք են հայտնում, որ ՀՔԾ-ն Գեղամ Պետրոսյանի նկատմամբ կալանքի միջնորդություն ընդհանրապես չի ներկայացնի, այն մտայնությամբ, որ եթե կալանքի տակ պահելու ժամկետը երկարացնելու վերաբերյալ միանգամից միջնորդություն չի ներկայացվել, նշանակում է, որ հետագայում նույնպես նման միջնորդություն չի լինի:

Իսկ միգուցե վաղ է դեռ այս մասին վստահություն հայտնելը, ի վերջո, նախորդ ողջ ընթացքում ՀՔԾ որոշումներում ոչ թե իրավական հիմքերն են գերակա եղել, այլ շոուն և աղմուկը:

Եվ քանի դեռ Անդրանիկ Քոչարյանը լռում է, կարելի է նաև հիպոթետիկ ենթադրություններ անել, ասենք, գուցե նա Մարտի 1-ի հետ կապված նոր բացահայտումներ է հղանում:

Հեղինակ` Արթուր Գահնապետյան