Փաստ ինֆո

ՀՀ երկրորդ նախագահ Ռոբերտ Քոչարյանի եւ մյուս պաշտոնյաների քրեական գործը դեռեւս չի մակագրվել այլ դատավորի, այն շարունակում է մնալ դատավոր Դավիթ Գրիգորյանի վարույթում, ում լիազորությունները ժամանակավորապես կասեցվել են դեռեւս հուլիսի 27-ին։ Համենայն դեպս, «Դատալեքս» դատական տեղեկատվական համակարգում նոր մակագրման մասին տեղեկությունը բացակայում է։

Երկրորդ նախագահի պաշտպանական խմբի անդամ Հովհաննես Խուդոյանը վստահ չէ՝ դատավոր Դավիթ Գրիգորյանի վարույթում գտնվող գործերի վերաբաշխումն ուշացնելու պատճառը տեխնիկական է, թե դիտավորություն։

«Դավիթ Գրիգորյանի վարույթում գտնվող գործերի վերաբաշխման ընթացքից որևէ նորություն չկա։ Պետք է անմիջապես լիազորությունները դադարեցնելու հաջորդ օրը վերաբաշխում կատարվեր։ Վստահ չեմ՝ սա դատական համակարգի թերացում է, թե դիտավորություն», - «Փաստինֆո»-ի հետ զրույցում ասաց փաստաբանը՝ վստահեցնելով, որ պատճառը կպարզեն։
Նա ընդգծեց՝ հստակ պահանջ կա, որ գործը շարունակվի և վերամակագրվի. «Եթե տեխնիկական խնդիրները չեն լուծում այն մարդիկ, որոնք պետք է լուծեն, ապա կարող ենք դիտավորություն տեսնել այստեղ», - ասաց Հ. Խուդոյանը։

Նշենք, որ պաշտպանական խմբի անդամ Հայկ Ալումյանը ԲԴԽ միջնորդություն էր ներկայացրել, որպեսզի դատավորի վարույթում գտնվող գործերի վերաբաշխմանը ներկա լինեն նաև լրագրողներ և փաստաբաններ, սակայն Հովհաննես Խուդոյանը վստահ չէ, որ այն կբավարարվի։
Ավելի վաղ «Փաստինֆո»-ն դատական դեպարտամենտից տեղեկացել էր, որ դատավորի վարույթում գտնվող բոլոր գործերը կհանձնվեն գրասենյակ և ըստ օրենքով սահմանված կարգի՝ համակարգչային ծրագրի միջոցով կվերաբաշխվեն։

Հիշեցնենք, որ Դավիթ Գրիգորյանն այն դատավորն է, որը մայիսի 18-ի որոշմամբ ՀՀ երկրորդ նախագահ Ռոբերտ Քոչարյանի նկատմամբ որպես խափանման միջոց էր ընտրել անձնական երաշխավորությունը, որպիսի միջնորդությամբ դատարանում հանդես էին եկել Արցախի գործող եւ նախկին նախագահները, իսկ մայիսի 20-ին որոշում էր կայացրել նաեւ քրեական գործի վարույթը կասեցնելու եւ ՍԴ դիմելու մասին։

Դատավորի նշված որոշումներից հետո դատախազությունը քրեական գործ է հարուցել մեկ այլ գործով պաշտոնեական կեղծիք կատարելու հատկանիշներով, որով, ի դեպ, ավելի վաղ՝ 2018 թվականի փետրվարին կայացվել էր քրեական գործի հարուցումը մերժելու մասին որոշում եւ հուլիսի 26-ին ԲԴԽ միջնորդություն ներկայացրել դատավոր Դավիթ Գրիգորյանի նկատմամբ քրեական հետապնդում հարուցելու համաձայնություն տալու մասին՝ երեք դրվագով։ Բարձրագույն դատական խորհուրդը հուլիսի 27-ին երկու դրվագով բավարարել է, իսկ մեկով՝ մերժել։ Օրենքի ուժով կասեցվել են դատավոր Դավիթ Գրիգորյանի լիազորությունները։

Հեղինակ` Հասմիկ Կոշկարյան