Փաստ ինֆո

«Երևանի պաշտպանության ճակատ» նախաձեռնության համակարգող Բաբկեն Հարությունյանի կարծիքով՝ Երևանի քաղաքապետ Հայկ Մարությանը չի կատարել իր նախընտրական խոստումները:

Նա անհանգստացած է աղբահանության խնդրով և այդ կապակցությամբ հարցմամբ դիմել է Երևանի քաղաքապետարան՝ ստանալու ‹‹Սանիթեք›› ընկերության և Երևանի քաղաքապետարանի միջև կնքված պայմանագիրը, սակայն հարցմանը քաղաքապետարանից այդպես էլ չեն պատասխանել:

«Անցել է օրենքով սահմանված 5-օրյա ժամկետն ու առ այսօր պատասխան չկա, չնայած նրան, որ քաղաքապետի մամուլի խոսնակը ֆեյսբուքի միջոցով, քննարկումների ժամանակ հավաստիացնում է, թե որևէ խնդիր և գաղտնիք չկա: Մարդիկ այդ պայմանագրի առանձին հատվածներին հղում անելով փորձում են ստեղծել հասարակական կարծիք››,-այսօր հրավիրված ասուլիսում ասաց Հարությունյանը:
Նա ընդգծեց, որ արդեն 10 ամիս է, ինչ Հայկ Մարությանը զբաղեցնում է Երևանի քաղաքապետի պաշտոնը և շատ հանգիստ կարող էր լուծարել ‹‹Սանիթեքի›› հետ պայմանագիրը:

‹‹Ես չեմ ասում, որ ‹‹Սանիթեքը›› պատշաճ աղբահանություն է իրականացնում, բայց եկեք նաև չպնդենք, որ քաղաքապետարանը որևէ թերացում չունի, հակառակ պարագայում քաղաքապետարանը մեծ սիրով պետք է հրապարակեր պայմանագիրը››,-ասաց «Երևանի պաշտպանության ճակատ» նախաձեռնության համակարգողը:

Պատասխանելով «Փաստինֆո››-ի հարցին՝ եթե ‹‹Սանիթեքի›› հետ պայմանագիրը խզվի, ապա ինչպե՞ս է աղբահանությունն իրականացվելու՝ հաշվի առնելով այն, որ նրան փոխարինող օպերատոր այս պահին չկա, Հարությունյանն ասաց.

«Քաղաքապետի պաշտոնը ոչ թե Բաբկեն Հարությունյանն է զբաղեցնում, այլ Հայկը Մարության, և որպես քաղաքապետ նա նախընտրական քարոզարշավի ժամանակ ասում էր, որ 6 ամսից մեկ տարվա ժամկետում աղբահանության խնդիրը պետք է լուծվի, աղբի ֆոնին տեսահոլովակներ էր նկարում, թե գալու է և խնդիրը լուծելու է: Հիմա դա է՞լ մենք պետք է մտածենք: Եթե չեն կարողանում լուծել, թող դիմեն հասարակությանը, մենք էլ հրավիրենք իրավաբանների ու հուշեն քաղաքապետարանին, խնդիրը լուծենք››:

Հարությունյանն ասուլիսի ավարտին քաղաքապետարանի ընդունարան հանձնեց 21 հարցում, որոնք վերաբերում են Հայկ Մարությանի նախընտրական խոստումներին վերաբերող հարցեր: Նա նաև նշեց, որ այս անգամ զիջումների չեն գնալու և եթե քաղաքապետարանից պատասխան չստանան, օրենքով սահմանված կարգով դիմելու են դատարան։

Մանրամասները՝ տեսանյութում

Հեղինակ` Սոնա Գեւորգյան