Փաստ ինֆո

Քաղաքագետ Արմեն Բաղդասարյանը կարծում է՝ ՀՀ վարչապետ Նիկոլ Փաշինյանն երեկ անդրադառնալով Սերժ Սարգսյանի իշխանության օրոք ստեղծված գաղտնի փաստաթղթին, պարզապես ցանկացել է անկեղծորեն զրուցել հասարակության հետ:

‹‹Եթե մեր երկիրը ինստիտուցիոնալ առումով գտնվում է ծանր իրավիճակում, ապա անկեղծ խոսակցություն էր պետք, և այդ վիճակից հնարավոր չի լինելու դուրս գալ առանց պետական կառույցների և հասարակության համագործակցության: Այսինքն, վարչապետի ելույթի այդ հատվածն ես ընկալում եմ, որպես հասարակության հետ անկեղծ խոսելու և համատեղ ջանքերով երկիրը ծանր վիճակից դուրս բերելու փորձ››,-‹‹Փաստինֆո››-ի հետ զրույցում ասաց քաղաքագետը:

Հիշեցնենք, որ երեկ ՀՀ վարչապետն ուղիղ եթեր էր մտել ու հայտարարել, թե արձակուրդի ժամանակ վերընթերցել է 2014թ.-ին՝ Սերժ Սարգսյանի իշխանության օրոք, կազմված փաստաթուղթը՝ հայտարարելով, թե Հայաստանի ինստիտուցիոնալ համակարգը գտնվում է կաթվածահար վիճակի մեջ։

Հարցին, հնարավո՞ր է այդպիսով Փաշինյանը փորձել է պատճառաբանել հասարակության ակնկալիքների չարդարացումը, Բաղդասարյանը պատասխանեց.

‹‹Չեմ կարծում, որ հիմնական ուղերձը դա էր: Այդ դեպքում այլ ձևերով կպատճառաբաներ, որ չի արդարացրել արագ փոփոխությունների ակնկալիքները: Այդտեղ ինքը խոսում է ինստիտուցիոնալ ձախողման մասին, և ընդհանրապես ձախողման մասին: Վերջի 10 տարիներին պաշտոնական տվյալներով երկրի բնակչության 13-14 %-ն արտագաղթել է, ուրեմն դա խոսում է պետության ձախողվածության մասին, այսինքն ընդամենն արձանագրում է այն, ինչ շատերը գիտեին››,-նշեց քաղաքագետն, ապա ավելացրեց, թե անգամ նախկին իշխանությունների համակիրներն են բաց տեքստով ասում, որ Հայաստանում կոռումպացված համակարգ է եղել, այն իրեն արդարացրել է և պետության կառավարման արդյունավետ ձև է:

Բաղդասարյանի խոսքով, այս փաստաթղթի առկայությունը խոսում է այն մասին, որ նախկին իշխանությունները լավատեղյակ են եղել, թե երկրում ինչ վիճակ է:
Նրա կարծիքով, ցանկացած իշխանություն ժամանակ առ ժամանակ պետք է այդպիսի հետազոտություններ պատվիրի, որպեսզի օբյեկտիվորեն տիրապետի իրավիճակին:

‹‹Վստահ եմ, որ դա արվել է և՛ Սերժ Սարգսյանի, և՛ Ռոբերտ Քոչարյանի իշխանության օրոք, այդպիսի հետազոտություններ գաղտնի արվում են նաև Նիկոլ Փաշինյանի օրոք, դա շատ սովորական բան է: Այն, որ նախկին իշխանությունների օրոք այդպիսի լայնածավալ գաղտնի հետազոտություն է իրականացվել, խոսում է նրանց առավելությունների և ոչ թե թերությունների մասին, ճիշտ են արել, այլ հարց է, որ չեն կարողացել կամ բավարար չափով չեն կարողացել եզրակացություններ անել և շտկել իրավիճակը››,-ասաց մեր զրուցակիցը:

Դիտարկմանը, որ եթե նման փաստաթղթի ստեղծումը դրական քայլ է, ապա ինչո՞ւ է նախկին իշխանության ներկայացուցիչներից Արմեն Աշոտյանը հերքում դրա գոյությունն ու ասում, որ դա Փաշինյանի անճարությունը քողարկելու հերթական փորձն է՝ Բաղդասարյանը չբացառեց, որ Աշոտյանն այդ փաստաթղթի գոյության մասին գուցե տեղյակ չի եղել:

‹‹Չգիտեմ՝ Արմեն Աշոտյանն ի՞նչի հիման վրա է ասում՝ այդպիսի փաստաթուղթ չկա, չեմ կարծում, թե նա գաղտնի փաստաթղթերի ամբողջական ցանկին ծանոթ է: Եթե դա ասեր Սերժ Սարգսյանը կամ Սարգսյանի օրոք ԱԱԾ տնօրենի պաշտոն զբաղեցրած անձը, ես ավելի լուրջ, ավելի առարկայական կընդունեի, բայց չի բացառվում, որ Աշոտյանը նման փաստաթղթից տեղյակ չլիներ››,-ասաց քաղաքագետն ու ընդգծեց, որ մտահոգիչ է, երբ ընդդիմությունը մի կողմից ասում է ինչու է Փաշինյանը նման գաղտնիք հրապարակում, մյուս կողմից էլ պահանջում փաստաթղթի ամբողջական տարբերակը հրապարակել:

Հեղինակ` Սոնա Գեւորգյան