Փաստ ինֆո

«Քաղաքացու որոշում» սոցիալ-դեմոկրատական կուսակցության ղեկավար Սուրեն Սահակյանը դիմել է Երևանի ընդհանուր իրավասության առաջին ատյանի դատարան`պահանջելով վերացնել ԲՀԿ առաջնորդ Գագիկ Ծառուկյանի ձեռնարկատիրական գործունեությանն ապօրինի մասնակցելու դեպքի առթիվ քրեական գործի հարուցումը մերժելու մասին ՀՔԾ քննիչի որոշումը։ Այս մասին «Փաստինֆո»-ին հայտնեց ՔՈ ՍԴԿ անդամ Միքայել Նահապետյանը:

Հիշեցնենք, որ «Քաղաքացու որոշում» ՍԴ կուսակցությունը հաղորդում էր ներկայացրել՝ ԱԺ «Բարգավաճ Հայաստան» խմբակցության ղեկավար Գագիկ Ծառուկյանի կողմից ձեռնարկատիրական գործունեությամբ ապօրինի զբաղվելու վերաբերյալ: ՀՔԾ-ն մերժել էր քրեական գործի հարուցումը, որից հետո ՔՈ-ն այն բողոքարկել էր դատախազին, որը քննիչի որոշումը թողել էր ուժի մեջ եւ հիմա արդեն այն վիճարկվում է դատական կարով:

«Փաստինֆո»-ի հետ զրույցում ՔՈ ՍԴԿ-ի անդամ Միքայել Նահապետյանն ասաց, որ գործը գտնվում է դատավոր Արտուշ Գաբրիելյանի վարույթում։ Տեղի է ունեցել մեկ դատական նիստ, որի մասին ծանուցագիրն ստացել են դատական նիստի ավարտից հետո:
Նահապետյանի համոզմամբ՝ բոլորը հիմքերը կան քրեական գործ հարուցելու համար, բայց քննիչը կանխակալ է եղել և աչք է փակել մի շարք հանգամանքների վրա:

ՔՈ անդամը ներկայացրեց մինչ դատարան դիմելը տեղի ունեցած պրոցեսներն ու նշեց, որ քննիչն անգամ չի անդրադարձել Ծառուկյանի ապօրինի ձեռնարկատիրությամբ զբաղվելու հարցին, փոխարենը քրեական գործ չհարուցելը պատճառաբանել է՝ նշելով, որ ՀՀ քրեական օրենսգրքի 310-րդ հոդվածը (Ձեռնարկատիրական գործունեությանն ապօրինի մասնակցելը) սահմանում է, որ ապօրինի ձեռնարկատիրությունը պետք է զուգորդվի նաև որևէ ընկերությանը հովանավորելու, արտոնություններ ու առավելություններ տալու, դրա համար ավելի բարենպաստ իրավիճակ ստեղծելու գործողությամբ:

«Քննիչն այդ հարցին չի անդրադարձել, քանի որ քննության ընթացքում բավարար տվյալներ ձեռք չեն բերվել՝ հովանավորելու կամ բարենպաստ վիճակի հետ կապված, հետևաբար բավարար ողջամիտ հիմքեր չեն տեսել քրեական գործ հարուցելու համար: Ավելին, Ծառուկյանը պատասխանել է, որ մի բան էլ վնաս է տվել իր կազմակերպությանը, ցեմենտի գինն իջեցնելու հրահանգներով»,-ասաց Նահապետյանը:

ՔՈ ՍԴԿ անդամը պատմեց, որ դրանից հետո դիմել են դատախազություն, ասել՝ ակնհայտ հովանավորություն է, երբ Ծառուկյանը, որպես պաշտոնյա, որպես քաղաքական գործիչ ներդրողների հետ հանդիպում է, ապա նրանց հետ համատեղ բիզնես է ստեղծում:

«Դա նշանակում է, որ նա իր պաշտոնեական դիրքն օգտագործում է բիզնես շահերի համար և ըստ այդմ հովանավորում այդ բիզնեսները: Տեղեկացրել ենք նաև, որ քննիչը կանխակալ է, քանի որ քրեական գործ չի հարուցում ու ողջամիտ, արժանահավատ է համարում Ծառուկյանի պնդումը, որ ինքն իր գործողությամբ օգուտ չի տվել, մի բան էլ վնաս է տվել այդ ապօրինի ձեռնարկատիրական գործունեությանը։ Այն, որ այդպիսով անձանց, կազմակերպությունների կամ պետության շահերին վնաս է պատճառել, դա ևս հանցագործություն է՝ նախատեսված 188-րդ հոդվածով»,-նշեց Նահապետյանը:

Նա ընդգծեց, որ դատախազին բողոք ներկայացնելիս՝ նրա ուշադրությունն են հրավիրել նաեւ այդ հանգամանքի վրա, փաստել, որ եթե կարծում են, որ քննիչը ճիշտ է գործել 310-րդ հոդվածով մերժելով քրեական գործի հարուցումը, ապա թող ուշադրություն դարձնեն 188-րդ հոդվածին, որովհետև նյութերի նախապատրաստման և փաստերի ստուգման ընթացքում ի հայտ է եկել հանգամանք, որը բողոքաբերը չի ներկայացրել, բայց քննիչը կարող է այդ մասով գործ հարուցել:

«Քննիչը կանխակալ է եղել, քանի որ ցանկացել է քրեական գործ չհարուցել, որի համար 310-րդ հոդվածն ինչպես կարողացել են լղոզել են և այդ լղոզելու ընթացքում այնքան անզգույշ են գտնվել, որ փաստեր են ցույց տվել արդեն մեկ այլ հանցագործության մասին ու դրանով էլ քրեական գործ չեն հարուցել: Իսկ հատկապես կարևոր գործերի քննության վարչության պետը մեր բողոքը մերժել է և ուժի մեջ թողել ՀՔԾ-ի որոշումը։ Նա ամբողջովին հիմնավորված համարելով 310-րդ հոդվածի հետ կապված քննիչի որոշումն ու կատեգորիկ չի անդրադարձել 188-րդ հոդվածի ծավալին»,-պատմեց ՔՈ ՍԴԿ անդամ Միքայել Նահապետյանը

Հեղինակ` Սոնա Գեւորգյան