Փաստ ինֆո

Քաղաքական ուժերն իրենք են որոշում իրենց քաղաքականությունն ու ռազմավարությունը: Կարծում եմ՝ ժողովրդավարական հասարակությունում յուրաքանչյուր քաղաքական ուժ ազատ է իր կամքն արտահայտել ու գաղափարները տարածել: ‹‹Փաստինֆո››-ի հետ զրույցում ասաց ԱՀ նախագահ Բակո Սահակյանի խոսնակ Դավիթ Բաբայանը՝ ԱՀ նախագահ Բակո Սահակյանի հրաժարականի պահանջի մասին  Արցախի նախկին պաշտպանության նախարար Սամվել Բաբայանի հայտարարությանը:

Նա ընդգծեց, որ ամեն բան պետք է լինի օրենքի սահմաններում, քաղաքական ուժը կարող է նման ցանկություն հայտնել, բայց կարևոր է՝ մյուսներին չպարտադրի:

‹‹Դա քաղաքական գործընթացի մի մասն է, և ճիշտ չի լինի այս կամ այն քաղաքական ուժի դիրքորոշումը քննադատել, կարևորը՝ ամեն բան լինի օրենքի սահմաններում և որևէ պարտադրանք որևէ մեկին չլինի››,-ասաց Բաբայանը:

ԱՀ նախագահի խոսնակն անթույլատրելի համարեց ոչ օբյեկտիվ կամ սուբյեկտիվ մոտեցման ցուցաբերումը մարդկանց, քաղաքական ուժերի, առավել ևս պետության նկատմամբ:

Մեր հարցին, արդյո՞ք մտահոգության տեղիք չեն տալիս Սամվել Բաբայանի հայտարարությունները, թե Արցախում ընտրություններն ընտրախախտումներով են անցել, և եթե Սահակյանը շարունակի պաշտոնավարել սպասվելիք ընտրությունները նույնպես կկեղծվեն, Դավիթ Բաբայանը պատասխանեց.

‹‹Արցախում ընտրությունները միշտ անցել են բաց և թափանցիկ, դրա մասին վկայել են բոլոր միջազգային փորձագետները, դիտորդները, որոնք բազմաթիվ երկրներից էին ժամանել և աննախադեպ քանակությամբ էին››:

Նա հրաժարվեց Բաբայանի այս հայտարարությունը ճիշտ կամ սխալ որակելուց, նշելով, որ ամեն բանի մասին ժամանակին համապատասխան կառույցները խոսել են.

‹‹Կարևորն այն է, որ մեզ մոտ շարունակական լինի բաց, թափանցիկ ընտրությունների անցկացումը››,-նշեց ԱՀ նախագահի խոսնակը:

Հեղինակ` Սոնա Գեւորգյան