Փաստ ինֆո

ՀՔԾ-ն ստացել է Բարձրագույն դատական խորհրդի միջնորդությունը՝ դատավոր Դավիթ Գրիգորյանի գործով արձանագրված խախտումների վերաբերյալ։ Այս մասին «Փաստինֆո»-ն տեղեկացավ ՀՔԾ մամուլի քարտուղար Մարինա Օհանջանյանից։

Նշենք, որ երեկ ԲԴԽ-ն հայտարարություն էր տարածել, որտեղ հայտնել էր իր մտահոգությունը։ Հայտարարության մեջ նշված էր, որ քննչական գործողություններն իրականացնելիս քննիչի կողմից կատարվել է ՀՀ քրեական դատավարության օրենսգրքով չնախատեսված գործողություն, այն է՝ կնքվել է դատավոր Դ. Գրիգորյանի աշխատասենյակի մուտքի դուռը, ինչով սահմանափակվել է վերջինիս մուտքն իր աշխատասենյակ։ ԲԴԽ-ն իր մտահոգությունն էր հայտնել վարույթն իրականացնող մարմնի կողմից հիշյալ գործողությունն իրականացնելու կապակցությամբ և միջնորդել ձեռնարկել օրենքով սահմանված համապատասխան միջոցներ։ Մ.Օհանջանյանի փոխանցմամբ՝ ԲԴԽ միջնորդությունն ստացվել եւ քննարկման առարկա է դարձվել։

Հիշեցնենք, որ Դավիթ Գրիգորյանն այն դատավորն է, որը մայիսի 18-ի որոշմամբ ՀՀ երկրորդ նախագահ Ռոբերտ Քոչարյանի նկատմամբ որպես խափանման միջոց էր ընտրել անձնական երաշխավորությունը, որպիսի միջնորդությամբ դատարանում հանդես էին եկել Արցախի գործող և նախկին նախագահները, իսկ մայիսի 20-ին որոշում էր կայացրել նաև քրեական գործի վարույթը կասեցնելու և ՍԴ դիմելու մասին։

Նշված որոշումներից հետո դատախազությունը հարուցել է քրեական գործ, որի շրջանակներում հուլիսի 30-ին նրան մեղադրանք է առաջադրվել ՀՀ քրեական օրենսգրքի 314 հոդվածի 1-ին մասի հատկանիշներով՝ պաշտոնատար անձի կողմից շահադիտական նպատակով կամ անձնական այլ դրդումներով կամ խմբային շահերից ելնելով պաշտոնեական կեղծիք կատարելու համար։

Աղբյուր` Փաստինֆո