Փաստ ինֆո

ՀՀ երկրորդ նախագահ Ռ. Քոչարյանին պատասխանատվության կանչելու գործընթացն այնքան վատ էր մտածված, որ նա սկսեց դառնալ գործոն։

«Փաստինֆո»-ի հետ զրույցում ասել է քաղաքագետ Հայկ Մարտիրոսյանը՝ պատասխանելով այն հարցին, թե ինչով է պայմանավորված այն հանգամանքը, որ վերջին վերջին մեկ տարվա ընթացքում քաղաքական բոլոր պրոցեսները ծավալվում եմ Ռ. Քոչարյանի դատավարության շուրջ ու կարծես թե իշխանություններն ամեն բան անում են, որպեսզի քաղաքական օրակարգը չփոխվի։

«Իշխանությունների անկարողությամբ՝ արդյունավետ կառավարում իրականացնելու: Քոչարյանին պատասխանատվության կանչել ցանկանալով՝ ամեն բան արեցին այնքան վատ մտածված, որ Քոչարյանը զրոյական վարկանիշից սկսեց արհեստական վարկանիշ կառուցել իր համար և սկսեց դառնալ գործոն: Դա անհավատալի մի բան էր ժողովրդական հսկայական նախնական աջակցություն վայելող իշխանության համար»,- ասաց Հ.Մարտիրոսյանը:

Նրա խոսքերով՝ հանաճարեղորեն անմիտ պետք է լինել, որպեսզի գնալ այն ճանապարհով, որով գործադիրը գնաց, մինչդեռ այդ հարցը կարելի էր լուծել շատ կտրուկ և շատ արագ և շատ հիմնավոր:

«Փոխարենը մեկ մեղադրանք միայն առաջադրեցին և այնպիսին՝ որով կարող էին և պատասխանատավության կանչել իրենց հոգևոր և գաղափարական հորը՝ Լևոն Տեր-Պետրոսյանին և իրենց մերժածին՝ Սերժ Սարգսյանին: Հետո ավելացրեցին ևս մեկ մեղադրանք: Չբարեփոխեցին դատական համակարգը և թույլ տվեցին, որպեսզի Քոչարյանը մի քանի անգամ հայտնվի ազատության մեջ: Այդ ամենն անհեթեթության գագաթնակետն էր: Եթե իմաստուն լինեին, ազնիվ և իրապես հեղափոխական՝ երեք նախագահներին էլ մեղադրանքներ կառաջադրեին և երկաթե բռունցքով այդ գործերը նոր՝ արմատապես փոփոխված անկախ և ազնիվ դատական համակարգով շատ արագ ավարտին կհասցնեին: Հիմա իրենք վճարելու են իրենց ապիկարության գինը»,- նշեց քաղաքագետը՝ ավելացնելով. «պարզապես այդ գնի մեծագույն մասն իրենց փոխարեն վճարելու է ժողովուրդը, որ իրենց հեղափոխական հռչակած ապահեղափոխական մի խումբ մարդկանց այդքան անսահման վստահությամբ երկրի կառավարում վստահեց»:

Աղբյուր` Փաստինֆո