Փաստ ինֆո

Բելառուսում ևս մեկ մահվան դատավճիռ է կայացվել՝ 50-ամյա տղամարդ Վիկտոր Պավլովի նկատմամբ, որը սպանել է 76 և 78 տարեկան երկու թոշակառու կանանց Պրիսուշինո գյուղում (Վիտեբսկի շրջան):

2019 թ-ի հունվարի 1-ին, կանանցից մեկի հարազատները չեն կարողացել կապ հաստատել նրա հետ՝ Ամանորի կապակցությամբ շնորհավորելու համար: Հաջորդ օրը նրանք կրկին փորձել են կապվել, բայց ոչ ոք չի պատասխանել հեռախոսազանգին: Լռությունը վերագրել են հեռախոսի անսարքությանը և դիմել համապատասխան ծառայություն, որը կարող էր ստուգել և լուծել խնդիրները: Արդյունքում երկու թոշակառու կանանց հայտնաբերել են տանը՝ մահացած:

Հարևանները պատմել են, որ կանայք ունեցել են տնտեսական մասով օգնական՝ հարևան Սլոբոդա գյուղի բնակիչ: Տղամարդը Վիկտոր Պավլովն էր, որին էլ ձերբակալել են: Այս մասին հայտնել է «Наша Нива» պարբերականը:

Քննությունը պարզել է, որ տղամարդը սպանությունը կատարել է դեկտեմբերի 30-ին: Նա թոշակառուներին հարվածներ է հասցրել փայտով: Բացի դա, Պավլովը գողացել է գումար և մի քանի շիշ գինի՝ մոտ վեց հազար ռուբլի արժողությամբ:

Վիտեբսկի շրջանային դատարանը Վիկտոր Պավլովին դատապարտել է բարձրագույն պատժամիջոցի՝ մահապատժի: Տղամարդուն կգնդակահարեն: Այս մասին հաղորդել է «Весна» իրավապաշտպան կենտրոնի կայքում: Նիստի ընթացքում դատախազը ուշադրություն է դարձրել այն փաստի վրա, որ հանցագործը նախկինում դատապարտված է եղել, ինչը հանդիսանում է ծանրացուցիչ հանգամանք:

Պավլովի փաստաբանը փորձել է ապացուցել, որ սպանությունը տեղի է ունեցել կոնֆլիկտի արդյունքում և հրահրվել է թոշակառուներից մեկի կողմից: Կինը նաև նշել է նաև, որ իր պաշտպանյալը համագործակցել է քննության հետ և խոստովանագիր է ներկայացրել՝ զղջալով իր արարքի համար: Փաստաբանը խնդրել է դատարանին՝ ուղղվելու ևս մեկ հնարավորություն տալ Պավլովին:

Այս տարվա հունիսին Բելառուսում արդեն մահապատժի է ենթարկվել 44-ամյա մի տղամարդ, որը երեք մարդ էր սպանել:

Բելառուսը շարունակում է մնալ Եվրոպայում և ԱՊՀ-ում միակ երկիրը, որտեղ դեռևս գործում է մահապատիժը: 1990 թվականից ի վեր 400 մարդ դատապարտվել է մահապատժի, նրանցից միայն մեկին է ներում շնորհվել:

Աղբյուր` Փաստինֆո