Փաստ ինֆո

Քոչարյանն իր հարցազրույցի միջոցով, ըստ էության, ուրվագծել է քաղաքական այն պրոեկտը, թե ինչպես պետք է իշխանափոխություն իրականացվի Հայաստանում։ ‹‹Փաստինֆո››-ի հետ զրույցում ասաց քաղաքագետ Աղասի Ենոքյանը՝ անդրադառնալով ՀՀ երկրորդ նախագահ Ռոբերտ Քոչարյանի «Գոլոս Արմենիի» թերթին տված հարցազրույցին:

Հիշեցնենք, որ Ռ.Քոչարյանը նշված հարցազրույցում հայտարարել է, որ  ձգողականության տարբեր ուժով մի քանի կենտրոններ կլինեն,  որոնց միջև ակտիվ համագործակցություն կապահովվի եւ որ այդ  գործընթացներում ինքը կարևոր օղակ կլինի, սակայն ոչ միակը։ Ովքեր են լինելու այդ կենտրոններում՝ հին դեմքե՞ր, թե՞ նոր երիտասարդություն՝ «Փաստինֆո»-ի հարցին ի պատասխան քաղաքագետը կարծիք հայտնեց, որ այդ նորաստեղծ ընդդիմությունում կլինեն և՛ հին, և՛ նոր դեմքեր ու կլինի, այսպես ասած, քաղաքական ուժերի ‹‹անսամբլ››:

‹‹Իմ պատկերացմամբ այնտեղ կլինեի Քոչարյանը, Հայ Յեղափոխական Դաշնակցությունը, որն արդեն իսկ համախմբման նման գործընթացներ է նախաձեռնել, ՀՀԿ-ն, քաղաքական ուժեր, ակտիվ հասարակական գործիչներ և այլն››,-ասաց քաղաքագետը:

Ենոքյանի խոսքով, ընդդիմությունն արդեն ինչ-որ չափով սթափվել է այն ապտակից, որը ստացել էր խորհրդարանական ընտրությունների ժամանակ, և աշնանը միգուցե  որոշակի քայլերի դիմի:

Այդուհանդերձ, քաղաքագետը կարծում է, որ Քոչարյանի քաղաքականություն վերադարձը սկսվել է։ Ավելին՝  նրա նկատմամբ քրեական հետապնդում սկսվելուց հետո Քոչարյանն այլևս այլընտրանք չուներ, քան վերադառնալ քաղաքականություն:

‹‹Եթե մինչ այդ նա հեռացած էր քաղաքականությունից, նույնիսկ Հայաստանից էր հեռացած, իր համար հանգիստ գտնվում էր Հունաստանում, ապա Նիկոլ Փաշինյանի այս քայլերը նրան ստիպեցին վերադառնալ քաղաքականություն››,-ասաց Ենոքյանը:

Խոսելով  ՀՀ երկրորդ նախագահի հայտարարության մասին, թե իշխանության հարցն ամեն պարագայում կորոշվի փողոցում, արտահերթ խորհրդարանական ընտրությունների միջոցով, քաղաքագետը նշեց.

‹‹Քոչարյանի ասածը բնական է, այս խորհրդարանը երբեք չի գնա արտահերթ ընտրությունների, և դրա համար պետք կլինի դժգոհություն, բայց դժվար է ասել, որ արդեն իսկ սկսվել է մարդկանց ‹‹հավաքագրումը››, որովհետև դեռևս դրա նշանները չեն երևում, մյուս կողմից էլ կարող է պատճառը լինել այն, որ ամառը քաղաքական առումով մեռած ‹‹սեզոն է››, միգուցե դրանով է պայմանավորված, որ հիմա այդ ակտիվությունը չի երևում››:

Ենոքյանը չի կարծում, թե Քոչարյանի քաղաքականություն վերադարձի հետ կապված ներկայիս իշխանությունները հանգիստ են ու ընդգծում է, որ իշխանությունը խոսքերով, քարոզչությամբ ամեն կերպ հակազդում է այդ ուժերին և ռեպրեսիաների մեխանիզմներ  կիրառում դատական համակարգի նկատմամբ, վարկաբեկում ողջ դատական իշխանությանը:

‹‹Այնպես որ իրենք իրենց քայլերն անում են իրենց ուժերի ներածին չափով, և ի վերջո չմոռանանք Իջևանի դեպքերը, որ պարզապես կարելի է գնահատալ, որպես պատժիչ գործողություն: Իշխանությունը ցույց տվեց, որ ինքն ունակ է նաև կոշտ մեթոդների: Իջևանի դեպքերը հետաքրքիր են նրանով, որ չկար ընդդիմադիր քաղաքական բևեռ եւ այդ կոշտ գործողությունները հնարավորություն չեղավ քաղաքական կապիտալի վերածելու››,-ասաց քաղաքագետ Աղասի Ենոքյանը:

Աղբյուր` Փաստինֆո