Փաստ ինֆո

Դատավորների միությունը լռում է: Դատավոր Դավիթ Գրիգորյանի լիազորությունների կասեցման մասին միությունը որևէ հայտարարություն դեռ չի տարածել:

Դատավորների միության մամուլի ծառայությունից մեզ հետ զրույցում ասացին,որ դա մեկ հոգու որոշելիք չէ, միությունը 230 անդամ ունի, հայտարարությունը պետք է միասնական լինի: Փոխարենը այս երևույթին բուռն արձագանքեցին փաստաբանները: Մոտ 80 փաստաբան պատրաստակամություն է հայտնել ստանձնել դատավոր Դավիթ Գրիգորյանի պաշտպանությունը: «Իրավական ուղի» ՀԿ համահիմանդիր Ռուբեն Մելիքյանը պնդում է՝ սա աննախադեպ երևույթ էր իր բնույթով, վերջին տարիներին անգամ այս երևույթին մոտ երևույթ չի եղել:

«Փաստինֆո»-ի հետ զրույցում փաստաբանն ասաց, որ իրավաբանական հանրությունը չի էլ պատկերացրել, որ նման բան մեր երկրում արդեն հնարավոր է:

«Սա մի քանի տարբեր փաստաբանների նախաձեռնություն է: Փաստաբան Երվանդ Վարոսյանի տվյալներով մոտ 80 փաստաբան արդեն միացել է նախաձեռնությանը՝ պատրաստակամություն է հայտնել ստանձնել դատավոր Դավիթ Գրիգորյանի պաշտպանությունը, կարծում եմ՝ այսօր կամ վաղը անվանական հրապարակում կլինի»:

Փաստաբան Ռուբեն Մելիքյանի տվյալներով այս պահին դատավոր Դավիթ Գրիգորյանին դեռ պաշտոնապես մեղադրանք առաջադրված չէ:

«Շաբաթ օրը եղել է ԲԴԽ համաձայնությունը անձին որպես մեղադրյալ ներգրավելու մասին, մեղադրանք առաջադրելու մասին, բայց երկուշաբթի աշխատանքային օրվա ավարտին, կարծեք թե, դեռ մեղադրանք առաջադրված չէր»:

Փաստաբանները երեկ շատ օպերատիվ և ակտիվ արձագանքեցին կատարված իրադարձությանը, հակառակ սրան դատավորներից քչերը հանդես եկան հրապարակային ելույթներով: Ռուբեն Մելիքյանը կարծում է, որ պատճառը դատավորների կարգավիճակն է:

«Փաստաբանները և դատավորները տարբեր կարգավիճակներ ունեն: Ճիշտ չեմ համարում մի հարթության վրա դնելը: Փաստաբանները ազատ մասնագետներ են, դատավորները ունեն խոսքի ազատության որոշակի սահմանափակումներ, իհարկե, ոչ բացարձակ, ես ողջունում եմ, որ որոշ դատավորներ հրապարակավ են արտահայտվել: Թերևս առավելապես այս հանգամանքով է պայմանավորված: Ես այն կարծիքին եմ, որ մենք չպետք է այս պահին ակնկալենք, ասենք, թե ինչու՞ մեկը խոսեց, մյուսը՝ ոչ: Յուրաքանչյուրս անձնական պատասխանատվություն պետք է զգա, թե՛ փաստաբանները, թե՛ դատավորները, թե՛ իրավապաշտպանները լուռ չմնալու, խոսելու և գործելու որովհետև սա աննախադեպ երևույթ էր իր բնույթով, վերջին տարիներին անգամ այս երևույթին մոտ երևույթ չի եղել: Իրավաբանական հանրությունը չի էլ պատկերացրել, որ նման բան մեր երկրում արդեն հնարավոր է: Ես իմ խնդիրն եմ տեսնում թույլ չտալ, որ այս բացառությունը չվերածվի կանոնի: Սա իրավական պետության հիմքերը քանդող երևույթ է: Անկախ անձանց անուններից, անկախ պատճառներից ու նպատակներից մենք պետք է թույլ չտանք այս երևույթի բյուրեղացումը»:

Հիշեցնենք՝ երեկ ԲԴԽ որոշմամբ կասեցվել են դատավոր Դավիթ Գրիգորյանի լիազորությունները, ինչից հետո փաստաբանների մի խումբ « #ստանձնում-եմ-դատավորի-պաշտպանությունը » հեշթեգով նախաձեռնությամբ է հանդես եկել:

Հեղինակ` Անահիտ Հովհաննիսյան