Փաստ ինֆո

Հայաստանի երկրորդ նախագահ Ռոբերտ Քոչարյանի նկատմամբ իրականացվում է անձնական հաշվեհարդար՝ վենդետա։ Մեկ տարի առաջ հնչեցրած այս հայտարարությունը ՀՀ երկրորդ նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանն այսօր վերահաստատեց։

Ինչպես ավելի վաղ տեղեկացրել ենք՝ Ռ.Քոչարյանին մեղադրանք է առաջադրվել «Մարտի 1-ի» գործով՝ սահմանադրական կարգը տապալելու, ինչպես նաեւ առանձնապես խոշոր չափերով կաշառք ստանալու համար։ Ուղիղ մեկ տարի առաջ երկրորդ նախագահը կալանավորվեց։

Քոչարյանի պաշտպանական խումբը ներկայացրել է տարբեր միջնորդություններ՝ նրան կալանքից ազատելու համար, եւ այս մեկ տարվա ընթացքում երկու անգամ փոխվել է նրա խափանման միջոցը եւ երկու դեպքում էլ այդ որոշումներին հաջորդել են տվյալ դատավորների նկատմամբ վարկաբեկող հայտարարությունները, ճնշումները։ Առաջին անգամ նրան կալանքից ազատեց վերաքննիչ քրեական դատարանի դատավոր Ալեքսանդր Ազարյանը՝ անձեռնմխելիության հիմքով՝ 2018 թվականի օգոստոսին, իսկ երկրորդ անգամ՝ Երեւանի ընդհանուր իրավասության դատարանի դատավոր Դավիթ Գրիգորյանը՝ 2019 թվականի մայիսին՝ նրա նկատմամբ որպես խափանման միջոց ընտրելով երաշխավորությունը։ Եթե Ա.Ազարյանի նկատմամբ 2018 թվականին սկսված ճնշումներն սահմանափակվեցին նրա թեկնածուականի շուրջ քննարկումներով, ապա Դավիթ Գրիգորյանի դեպքում, որը ոչ միայն խափանման միջոցն էր փոխել, այլ նաեւ ՍԴ դիմելու որոշում կայացրել, հարուցվեց քրեական գործ։

Այսօր տեղի ունեցած մամուլի ասուլիսում Վիկտոր Սողոմոնյանը պնդեց, որ նախկին նախագահի նկատմամբ հարուցված քրեական գործը, ինչպես նաև կիրառված կալանքը ապօրինի է, որ տեղի ունեցող իրադարձությունները որևէ կապ չունի մարտի 1-ի տասը զոհի սպանության բացահայտման հետ։

«Մենք այն ժամանակ էլ վստահ էինք, որ Քոչարյանին ապօրինի կալանքի տակ պահելը լուրջ հարվածներ է հասցնելու երկրի, պետության վարկին։ Ցավոք սրտի, այսօր մենք դա արձանագրում ենք։ Ո՞ւր են մարտի 1-ի մեղավորները, բացահայտե՞լ եք սպանությունները։ Իհարկե՝ ոչ։ Վերջերս մամուլում տեսա, որ մի ոստիկանի կալանավորումը որևէ հիմք չունի և նա առնչություն չունի սպանության հետ։ Սա՞ է բացահայտումը», - հարցեր բարձրացրեց Սողոմոնյանը։

Աղբյուր` Փաստինֆո