Փաստ ինֆո

Հայաստանում Բարձրագույն դատական խորհուրդ գոյություն չունի: «Փաստինֆո»-ի հետ զրույցում ասաց փաստաբան Երվանդ Վարոսյանը՝  ընդգծելով, որ դատավոր Դավիթ Գրիգորյանի լիազորությունները կասեցնելու որոշման հետ ԲԴԽ-ն իր լուծարման որոշումն է կայացրել:

«Կարծում եք, որ ԲԴԽ կա՞ Հայաստանում: Ես այլ կարծիքի եմ, գոյություն չունի: Իրենք որոշում կայացրին ԲԴԽ-ն լուծարելու մասին, իրականում»,- ասաց փաստաբանը:

Մեր այն հարցին, թե  կապ տեսնո՞ւմ է Դավիթ Գրիգորյանի լիազորությունները կասեցնելու ու Ռոբերտ Քոչարյանի քրեական գործով կայացված որոշումների՝ կալանքից ազատելու, ՍԴ դիմելու միջեւ,, փաստաբանը պատասխանեց, որ սա ակնհայտ քաղաքական պատվեր է: 

«Սա քաղաքական պատվեր է: Այս ամբողջ շրջանակը սկսած քրեական գործի հարուցումից, քրեական հետապնդումից, ԲԴԽ-ի կայացրած որոշումից, լիազորությունների կասեցումից, միայն ու միայն ոչ իշխանահաճո որոշում կայացնելու հետևանք է, ինչը տեղով խայտառակություն է»,- նշեց փաստաբանը:

Նրա կարծիքով՝ այս որոշումն այնքան Դավիթ Գրիգորյանին  չի ուղղված,  ինչքան ամբողջ դատական համակարգին: Պնդում է՝ փորձում են վախեցնել:

«Սա հանգեցնելու է նրան, որ առանց այդ էլ մեր անկատար  ու հիվանդ դատական համակարգը մեկ քայլ նահանջ է կատարելու՝ վերածվելով գործադիր իշխանությանը կից մի փոքրիկ բաժանմունքի, որտեղ նստած կլինեն վախեցած , սև շորեր հագած ինչ-որ մարդիկ: Իմ իմացած դատական համակարգում կգտնվեն մի քանի անհատ դատավորներ, որոնք կպայքարեն , իսկ մնացածը ոնց, որ 20 տարի, 10 տարի մորթապաշտի նման գլուխները կախ ամեն մեկը իր անձնականի մասին է մտածել ու ամեն մեկը իր որոշմամբ ընդհանուր հրահանգից դուրս չգալու որոշման մասին է մտածում, այդպես էլ շարունակելու է»,- ասաց փաստաբան Երվանդ Վարոսյանը:  

Ավելի վաղ  Երվանդ Վարոսյանը տեղեկացրել է, որ 50 փաստաբան պատրաստակամություն է հայտնել ստանձնել դատավոր Դավիթ Գրիգորյանի պաշտպանությունը՝ այսպիսով արտահայտելով իր անհամաձայնությունը: Ե.Վարոսյանը վստահ է՝ նրանց թիվը բազմապատկվելու է:

Հեղինակ` Անահիտ Հովհաննիսյան