Փաստ ինֆո

Բարձրագույն դատական խորհուրդը կասեցրել է Երեւանի ընդհանուր իրավասության դատարանի դատավոր Դավիթ Գրիգորյանի լիազորությունները: Այս մասին հաղորդում է ArmLur.am-ը`նշելով, որ իրենց ունեցած տեղեկությունները հաստատել է  Դատական դեպարտամենտի ղեկավար Կարեն Փոլադյանը:
 
Նշվում է, որ Համապատասխան միջնորդությամբ հանդես է եկել ՀՀ գլխավոր դատախազությունը, ինչն էլ բավարարվել է:
 
Հիշեցնենք, որ դատավոր Դավիթ Գրիգորյանի վարույթում է գտնվում ՀՀ երկրորդ նախագահ Ռոբերտ Քոչարյանի քրեական գործը, որը մայիսի 18-ին բավարարել էր Արցախի  ներկա եւ նախկին նախագահների` երաշխավորությամբ հանդես գալու միջնորդությունը ու փոխել Ռ.Քոչարյանի  խափանման միջոցը, իսկ մայիսի 20-ին որոշում էր կայացրել վարույթը կասեցնելու եւ Սահմանադրական դատարան դիմելու մասին: Այս որոշումները դատախազությունը բողոքարկեց, այդ թվում` ՍԴ դիմելու որոշումը, որոնք բավարարվեցին: Այդուհանդերձ, ՍԴ-ն գտավ, որ դատավոր Գրիգորյանի դիմումը քննության ընդունելու հիմքեր կան ու աշխատակարգային որոշմամբ այն մասամբ վարույթ  ընդունեց ու իր հերթին որոշեց վարույթը կասեցնել ու խորհրդատվական կարծիքի համար դիմել Վենետիկի հանձնաժողով ու ՄԻԵԴ:
 
Ավելի ուշ հայտնի դարձավ, որ Ռոբերտ Քոչարյանի գործով նշված որոշումները  Դավիթ Գրիգորյանի կողմից կայացվելուց հետո դատախազությունը հարուցել է քրեական գործ` պաշտոնատար անձի կողմից առերեւույթ կեղծիք կատարելու դեպքի առթիվ: Ընդ որում` հարուցված քրեական գործը վերաբերում է 2018 թվականի աշնանը տեղի ունեցած մեկ այլ  դեպքի, որի վերաբերյալ քաղաքացու ներկայացրած հաղորդման հիման վրա 2019  թվականի փետրվարին մերժվել էր քրեական գործի հարուցումը, իսկ հունիսին` հարուցվել:
 
Դավիթ Գրիգորյանի աշխատասենյակն օրենքի խախտումով են խուզարկել

Քրեական գործի հարուցելու որոշումը Դ.Գրիգորյանի փաստաբանը բողոքարկել է գլխավոր դատախազին, որն ստացվել է դատախազությունում, բայց քննարկման արդյունքների մասին դեռ պաշտոնական հաղորդագրություն չի տարածվել:
 
Ընդ որում`նշված գործի շրջանակներում դատավորի աշխատասենյակում կատարված խուզարկության արդունքում առգրավվել էր  Ռոբերտ Քոչարյանի քրեական գործին առնչվող նյութեր:
 
Հուլիսի 31-ին լրանում է դատավոր Դավիթ Գրիգորյանի արձակուրդը ու նա պետք է վերադառնա աշխատանքի ու, ենթադրվում է,  քննության առարկա պետք է դարձներ Ռոբերտ Քոչարյանին գրավով ազատ արձակելու  փաստաբանների միջնորդությունը: Ի սկզբանե, կանխատեսվում էր, որ հարուցված քրեական գործը շրջանակներում փորձ է արվելու կարգավիճակ տալ դատավոր Դավիթ Գրիգորյանին` Քոչարյանի քրեական գործից  հեռացնելու համար: «Փաստինֆո»-ի տեղեկություններով` նրան կարգավիճակ դեռ չի տրվել, սակայն բացառված չէ, որ առաջիկա օրերին արդեն նա կներգրավվի որպես կասկածյալ:
 
Դատավորի լիազորությունների կասեցումը ենթադրում է, որ նրա վարույթում գտնվող քրեական գործերը, այդ թվում` Ռոբերտ Քոչարյանի, կվերամակագրվեն այլ դատավորների:

Աղբյուր` Փաստինֆո