Փաստ ինֆո

Ապրել Հայաստանում, աշխատել Հայաստանում և նեցուկ լինել Հայաստանի զարգացմանը։ Այս կարգախոսով է առաջնորդվում գեղանկարիչ Էրիկ Դավթյանը։ Ծնվել է Սյունիքի մարզի Կապան քաղաքում, նկարել սկսել է դեռ վաղ տարիքից, իսկ պրոֆեսիոնալ գեղանկարչությամբ զբաղվում է 4 տարի։ Նկարչի արվեստում ամենամեծ դերակատարը, թերևս, հայրենիքն է և հայրենի քաղաք Կապանը։

«Կապանն ունի հիասքանչ բնություն, պատմամշակութային վայրեր։ Այստեղ մարդիկ հյուրասեր են, խիզախ, ազնվագույն, բարի են ու արդարամիտ։ Կապանում կան պատկառելի փորձ ունեցող և երիտասարդ նկարիչներ, որոնք գունային հետաքրքիր լուծումներով և իրենց մտքերով գեղեցիկ կտավներ են ստեղծում»,- ասաց նկարիչը` ընդգծելով, որ նրանց հետ շփումը մեծ հաճույք է պատճառում իրեն։

Էրիկի կարծիքով ամեն ինչի հիմքում ընկած է սերը։ Նա իր մուսան համարում է արվեստի հանդեպ սերը և գեղանկարչության հետ կապվածությունը. «Գեղանկարչությունն աստվածային գիտություն է, որը մարդուն դաստիարակում է, տալիս է իմաստություն, գեղեցիկը տեսնելու հնարավորություն, մաքրում է նրան ` դարձնելով արդարամիտ և աշխատասեր»։

Էրիկ Դավթյանը նկարում է այն, ինչ կա բնությունում։ Մարդկանց պատկերում է այնպես, ինչպես որ իրենց բնավորությունն ու խառնվածքն են։ Հիացմունքի ու գովեստի խոսքեր շատ են հնչում, սակայն նկարչի համար ավելի հաճելի է լսել փորձ կամ ուղղակի ճաշակ ունեցող մարդկանց դիտողությունները։

Էրիկը երկրորդ մասնագիտությամբ դիզայներ է։ Ստեղծագործելուց զատ սիրում է նաև սպորտով զբաղվել և կարդալ համաշխարհային արվեստի մասին։Կարծում է՝ ինչպես տեխնոլոգիական աշխարհում, այնպես էլ արվեստում փոփոխությունները շատ են , ուստի փորձում է հետամուտ լինել դրանց։ Վստահ է ` ընտանիքին ու հայրենիքին պիտանի լինելու համար ունի մեծ պոտենցիալ։

Նկարիչը գնորդներ ունի տարբեր երկրներից։ Վստահեցնում է` մարդիկ, որոնք ձեռք են բերում կտավները, դառնում են իր բարեկամները. « Ունեմ սփյուռքահայ լավ բարեկամներ։ Նրանցից մեկը Հրայր Մովսիսյանն է, ով ինձ և բազմաթիվ այլ գեղանկարիչների ձեռք է մեկնում` ուղարկելով ժամանակակից գործիքներ ու ներկեր։

Կապանում, ըստ նկարչի, մշակույթի բնագավառում փոփոխությունները շատ են։ Մշակութային ղեկավարությունն էլ հմուտ է աշխատում. «Վերջին ընտրություններում Կապանն ունեցավ համայնքի նոր ղեկավար , որն ամեն ինչ անում է մեր քաղաքի բարեկեցության, մեր ժողովրդի հույսերն արդարացնելու համար։ Քաղաքում նկատելի են դեպի դրականն իրականացվող փոփոխությունները, ինչը ոգևորում և խթանում է մեր ստեղծագործական աշխատանքը», - ասաց նկարիչը՝ հորդորելով մարդկանց այցելել Կապան և տեղում ծանոթանալ ստեղծված բարենպաստ պայմաններին։ 

Հեղինակ` Հասմիկ Կոշկարյան