Փաստ ինֆո

Անցած տարի հունիս-հուլիս ամիսների տնտեսական ակտիվության բարձր ցուցանիշը մեծամասամբ պայմանավորված էր ստվերի կրճատմամբ։ «Փաստինֆո»-ի հետ զրույցում 2019թ. հունիսին արձանագրված տնտեսական ակտիվության ցուցանիշի վերաբերյալ այս կարծիքն արտահայտեց տնտեսագետ Հայկազ Ֆանյանը։

«Նախորդ տարի հունիսին բազմաթիվ գործոնների ազդեցությամբ արձանագրվել էր տնտեսական ակտիվության ցուանշի (ՏԱՑ) 8.7 տոկոս աճ, այսինքն այս տարվա հունիս ամսվա ՏԱՑ-ի հաշվարկման բազիսը կտրուկ մեծացել էր, հետևաբար այս տարվա հունիսի ՏԱՑ-ը ավելի համեստ է ստացվել», - ասաց տնտեսագետը։

Նա ընդգծեց, որ նախորդ տարի արձանագրված բարձր ցուցանիշի վրա իր ազդեցությունն է թողել մի շարք ոլորտներում ստվերի կրճատումը. «Կացության և հանրային սննդի կազմակերպման ոլորտում թողարկման հավելաճը կազմել էր 27.1 տոկոս, առողջապահության ոլորտում՝ 23.2 տոկոս։ Ակնհայտ է, որ նման աճը ստվերի կրճատման արդյունք է», - նշեց Հայկազ Ֆանյանը։

Ինչ վերաբերում է գյուղատնտեսության ոլորտին, ապա տնտեսագետը նկատեց, որ այն տարիներ շարունակ ուռճացված է եղել։ Նրա վստահեցմամբ 2018թ.-ի հունիս-հուլիսին աճ էր արձանագրվել, որից հետո ցուցանիշն ընկել էր։ Հայկազ Ֆանյանը, իհարկե, չի բացառում նաև այն տարբերակը, որ գյուղացիներն իրականում քիչ սերմ են ցանել, սակայն որպես հիմնական պատճառ նշում է վիճակագրությունն իրականության դաշտ բերելը. «Ժամանակին սովորության համաձայն մարզպետները միշտ թվերը բարձրացրել են, որպեսզի իրենց մարզն առաջավոր ցույց տան։ Նախկինում գյուղատնտեսական տվյալները վարչական հաշվառման միջոցով էին հավաքում, իսկ հիմա փոխվել է։ Փորձում են ավելի ռեալ դաշտ բերել, ինչի արդյունքում էլ անկում է արձանագրվում», - ավելացրեց տնտեսագետը։

Հեղինակ` Հասմիկ Կոշկարյան