Փաստ ինֆո

Պետությունը հեպատիտների կանխարգելման և վերահսկման ծրագրի շրջանակում 2020 թվականից հեպատիտ Ց-ով տարեկան 1000 հիվանդի կապահովի անվճար դեղորայքով։ Առաջնահերթություն կտրվի այն անձանց, ում հիվանդությունը համարվում է ծանր:  Հեպատիտի դեմ պայքարի համաշխարհային օրվան նվիրված ասուլիսում այս մասին խոսեցին պատասխանատուները:

«Հաշվի առնելով խնդրի կարևորությունը՝ առողջապահության նախարարությունը հաստատել է «Արտաընդերային վիրուսային հեպատիտների կանխարգելման և վերահսկման 2019-2023թթ ծրագիրը»: Այն բաղկացած է մի շարք ռազմավարական ուղղություններից, և դրանք համահունչ են Առողջապահության համաշխարհային կազմակերպության մինչ 2030թ հեպատիտների էլիմինացիայի գլոբալ ռազմավարությանը: Տարբեր ռազմավարական ուղղություններ են ներառված՝ սկսած պատվաստումային գործընթացի կատարելագործումից։ Տարեկան 1000 հիվանդի պետպատվերի շրջանակում կտրամադրվեն դեղեր»,-ասաց «Հիվանդությունների վերահսկման և կանխարգելման ազգային կենտրոն»-ի Ոչ վարակիչ հիվանդությունների ներհիվանդանոցային վարակների համաճարակաբանության բաժնի պետ Ռոմելլա Աբովյանը:

Ծրագրով նախատեսվում են նաև ներհիվանդանոցային վարակների կանխարգելմանն ուղղված քայլեր:

«Նորք» ինֆեկցիոն հիվանդանոցի հեմատոլոգիայի բաժանմունքի վարիչ, «Հայկական լյարդաբանական ֆորում» ասոցիացիայի նախագահ Հասմիկ Ղազինյանը կարևորեց, որ հեպատիտ Ց-ով 1000 հիվանդի դեղորայքային բուժման  հոգսն իր վրա կվերցնի պետությունը: «Մենք մշակել ենք չափանիշներ ու քննարկում ենք, թե ովքեր կարող են ստանալ: Եվ այս դեպքում ծանրությանը գնահատական են տալիս լյարդում առաջացած ֆիբրոտիկ փոփոխություններով: Բոլոր հիվանդները, որոնք կընդգրկվեն ցուցակում,  պետք է  ունենան ֆիբրոզի աստիճան: Առաջնությունը տրվելու է այն մարդկանց, որոնց հիվանդությունը համարվում է ծանր»,-ասաց նա:

Նախատեսված երկու դեղերի կոմբինացիան 18 տարեկանից բարձրերի համար է: Այդ դեղերով բուժման տևողությունը կլինի 3 ամիս:

ՀՀ ԱՆ Հիվանդությունների վերահսկման և կանխարգելման ազգային կենտրոնի գլխավոր տնօրենի խորհրդական, Իմունկանխարգելման ազգային ծրագրի ղեկավար Գայանե Սահակյանը նշեց՝ ռազմավարական ծրագրում պատվաստումները շատ մեծ բլոկ են կազմում: Առաջինը մորից երեխային փոխանցվող հեպատիտ Բ-ի կանխարգելման համար նորածինների պատրաստվումներն են: «Բավականին բարձր է պատվաստման ցուցանիշը, նորածինների 97 տոկոսը պատվաստումները ստանում են:  Եթե մորից մանկանը փոխանցվում է հեպատիտ Բ-ի վիրուսը, այդ դեպքում խրոնիզացիան բավականին բարձր է լինում: Այս տեսանկյունից նորածինների պատվաստումների բարձր տոկոսի ապահովումը շատ կարևոր է: Եվ մանուկների շրջանում գրեթե չունենք սուր հեպատիտ Բ-ով հիվանդացման դեպքեր»,-ասաց Սահակյանը:

Աղբյուր` Փաստինֆո