Փաստ ինֆո

Դատավոր Դավիթ Գրիգորյանի աշխատասենյակում կատարված քննչական գործողությունների վերաբերյալ ԲԴԽ-ն հրապարակային որևէ հայտարարությամբ հանդես չի եկել՝ երևի թե, լռությունը համաձայնության նշան է:

Այսօր տեղի ունեցած մամուլի ասուլիսում հայտարարել է «Իրավական ուղի» ՀԿ համահիմնադիր, միջազգային իրավունքի մասնագետ Ռուբեն Մելիքյանը՝ մտահոգություն հայտնելով, որ քննչական գործողությունների կատարումն ունի զուտ քաղաքական դրդապատճառներ, ուստի պատկան մարմինները որևէ կերպ դրան չեն արձագանքում:

«Մենք ճիշտ չենք համարում նման արձագանքը: ԲԴԽ-ն այս պահի դրությամբ իր սահմանադրական թիվ մեկ գործառույթը չի իրականացրել, այն է՝ ապահովել դատավորի անկախությունը: Իմ կարծիքով այդ մասին պետք է խոսել, առաջին հերթին, որպեսզի դա դառնա մեր հանրության սեփականությունը, որպեսզի նրանք կարողանան ծանրութեթև անել ու հասկանալ ինչը՝ ինչ է: Ինչ վերաբերում է քաղաքական կոնտեքստին, ապա ամեն ինչ պարզ է: Լինում է հանցագործության մասին հաղորդում, որը բոլոր ինստանցիներով անցնում է , պարզվում է, որ սա անգամ քրեական գործ հարուցելու հարց չէ, մեկ էլ լինում է հանրային մեծ հնչեղություն ունեցող որոշում, որից մի երեք օր հետո անձը նորից ներկայանում է և նոր դիմում է ներկայացնում: Ըստ էության նույն բանի մասին, բայց Դատախազությունն ասում է այլ բանի մասին: Հետևությունները կարծում եմ կարող է յուրաքանչյուրը անել: Գործադիր իշխանությունը ունի հսկայական հնարավորություններ, մենք տեսնում ենք դրանց օգտագործումը», - ասաց Ռուբեն Մելիքյանը:

Ըստ նրա՝ զանգեր չեն լինում, բայց լինում են այսպիսի բաներ: Ոստիկանությունը հսկում է դատավորի աշխատասենյակի փակ դուռը: «Հնարավոր է դատողություններ անել, ասել՝ սա այսպես է, սա այնպես է, բայց ո՞ւր են ապացույցները։ Եթե գործադիր իշխանությունն ասում է, որ հանցագործություն է տեղի ունենում, ու մեկ օր, կամ կես ժամ հետո ապացույց չի ներկայացնում, արժեզրկվում է գործադիր իշխանության խոսքը ։ Չեմ պատկերացնում, որ գործադիր իշխանությունը խոսի միջամտությունների մասին, բայց ապացույց չներկայացնի, այդ դեպքում մյուսն էլ կասի, թե սա հանրությանը դատական իշխանության դեմ տրամադրելու ձև է»,- նշել է Ռ.Մելիքյանը։

Հեղինակ` Անահիտ Հովհաննիսյան