Փաստ ինֆո

«Գործարար միջավայրի հետ բազմաթիվ քննարկումների արդյունքում գնացինք այն իրավակարգավորումներին, որ ազատականացրեցինք ՀԴՄ-ի դաշտը։ Ցավոք, այսօր միայն մեկ ընկերություն է հայտարարել ՀԴՄ-ների որոշակի խմբաքանակ ունենալու մասին։ Կուզեինք, որ ոչ թե մեկը լիներ, այլ 11 կամ 101, և այդ գործընթացը լիներ ոչ թե հիմա, այլ 6 ամիս առաջ», - լրագրողների հետ զրույցում ասաց ՊԵԿ նախագահ Դավիթ Անանյանը։ Լրագրողի այն դիտարկմանը, որ գործարարները պնդում են, թե 6 ամիս առաջ  ՊԵԿ-ը խոչընդոտներ է ստեղծել, Դավիթ Անանյանն ասաց։

«ՊԵԿ-ը որևէ խոչընդոտ չի ստեղծել։ Եթե այդպիսի հայտարարություններ կան, ապա թող փաստեր ներկայացնեն։ Այլապես կհամարենք դրանք պարզ ու պրիմիտիվ հեյրուրանքներ», - ասաց Դավիթ Անանյանը։ Նա ավելացրեց, որ իրենց հաշվարկներում չեն սխալվել։ Ակնկալում էին՝ բիզնեսը համապատասխան ազդակ պետք է աներ, հսկիչ դրամարկղային մեքենաների մոդելներ բերեր և հայտարարագրեր, սակայն սպասելիքները չարդարացան։

«Ես դժգոհ եմ ազատականացված գործընթացի ակունքում կանգնածների լռությունից ու անգործությունից։ Հիմա մեր պաշարը սպառվել է, բիզնեսն էլ մեր սպասածին չի արձագանքել», - նկատեց ՊԵԿ նախագահը։ Վերջինիս հաղորդմամբ այս պահի դրությամբ ունեն 10 հազ հայտ-դիմում, որոնք չեն կարողանում բավարարել։ Մինչև վերջերս ապահովում էին նոր կազմակերպությունների դիմումները.

«10 օր է, ինչ սպասարկում ենք միայն սահմանամերձ գոտիներում գործունեություն իրականացնողներին, քանի որ պարտավոր ենք նրանց անվճար տրամադրել հսկիչ դրամարկղային մեքենաներ։ 600 հսկիչ դրամարկղային մեքենա ունենք, որոնք պահել ենք սահմանամերձրի համար», - ասաց Դավիթ Անանյանը՝ ընդգծելով, որ եթե ընկերությունը չունի հսկիչ դրամարկղային մեքենա, ապա չի կարող գործունեություն ծավալել, հակառակ դեպքում կտուգանվի

Ստեղծված իրավիճակի համար Դավիթ Անանյանը հորդորեց չմեղադրել ո՛չ կառավարությանը, ո՛չ էլ պետեկամուտների կոմիտեին, այլ ՀԴՄ դաշտի ազատականացման ջատագովներին։

Հեղինակ` Հասմիկ Կոշկարյան