Փաստ ինֆո

Ազգային անվտանգության ծառայությունը տեղեկություններ չի տրամադրում Պետական վերահսկողական ծառայության բարձրաստիճան պաշտոնատար անձանց մասնակցությամբ կոռուպցիոն գործի քրեական գործի քննության ընթացքի մասին։

Հիշեցնենք, որ ամիսներ առաջ ն հայտարարվեց Պետական վերահսկողության ծառայությանն առնչվող կոռուպցիոն գործի բացահայտման մասին։ Գործի շրջանակում մեղադրանք էր առաջադրվել ՊՎԾ պետ Դավիթ Սանասարյանին, Գնումների գործընթացների վերահսկողության վարչության պետի ժամանակավոր պաշտոնակատար Ս.Ադյանին եւ նույն վարչության գլխավոր մասնագետ Գեւորգ Խաչատրյանին։

«Փաստինֆո»-ն գրավոր հարցմամբ դիմել էր ԱԱԾ՝ խնդրելով տեղեկություններ տրամադրել 2019 թվականի փետրվարի 20-ին ՊՎԾ աշխատակիցների վերաբերյալ հարուցված քրեական գործի մասին։ Մասնավորապես, նկատի ունենալով հանրային շահը, խնդրել էինք նշել, թե հարուցված քրեական գործի շրջանակում որպես մեղադրյալ ներգրավված քանի անձ կա, նրանցից յուրաքանչյուրը որ հոդվածով է մեղադրվում, եւ յուրաքանչյուրի նկատմամբ ինչ խափանման միջոց է ընտրվել։ Հետաքրքրվել էինք՝ արդյո՞ք գործի շրջանակում բացահայտվել են առերեւույթ հանցագործության հատկանիշներ պարունակող այլ դրվագներ, եւ արդյո՞ք լրացվել են Դավիթ Սանասարյանին, Գեւորգ Խաչատրյանին եւ Սամվել Ադյանին առաջադրված մեղադրանքները։ Խնդրել էինք նշել նաեւ, թե ինչ փուլում է գտնվում քրեական գործի նախաքննությունն այս պահին։

ԱԱԾ-ն ներկայումս հրաժարվել է որեւէ տեղեկատվություն տրամադրել՝ վկայակոչելով նախաքննական գաղտնիքը։ «ՀՀ պետական վերահսկողական ծառայության աշխատակիցների վերաբերյալ ՀՀ ազգային անվտանգության ծառայության քննչական դեպարտամենտում հարուցված քրեական գործի վերաբերյալ հնարավոր չէ տրամադրել տեղեկություններ՝ հաշվի առնելով ՀՀ քրեական դատավարության օրենսգրքի 201-րդ հոդվածով նախատեսված նախնական քննության տվյալների հրապարակման անթույլատրելիությունը»,- նշված է ԱԱԾ գրավոր պատասխանում: Միաժամանակ նշվում է, որ հետագայում նման խնդրանքով դիմելու դեպքում՝ նախնական քննության տվյալների հրապարակման անթույլատրելիությունը վերանալու պարագայում, հնարավոր է, որ տրամադրվեն տեղեկություններ:

Ավելի վաղ հայտնել ենք, որ ԱԱԾ պաշտոնական հաղորդագրության համաձայն՝ ՀՀ պետական վերահսկողական ծառայության գնումների գործընթացների վերահսկողության վարչության պետի ժամանակավոր պաշտոնակատար Ս.Ադյանը, ունենալով պետության միջոցներով գնումների գործընթացը կանոնակարգող օրենսդրության պահանջների պահպանման նկատմամբ վերահսկողության իրավասություն, նույն վարչության գլխավոր մասնագետ Գ. Խաչատրյանի հետ նախնական համաձայնությամբ, առերևույթ անձնական շահագրգռվածությունից ելնելով, ծառայության շահերին հակառակ օգտագործելով իրենց պաշտոնեական դիրքը, 2018-2019թթ. ընթացքում ապօրինի կերպով միջամտել են վերահսկվող օբյեկտների՝ ՀՀ առողջապահության նախարարության և մի շարք բժշկական կենտրոնների կարիքների համար անհրաժեշտ բժշկական սարքավորումների ձեռքբերման նպատակով կազմակերպված գնման ընթացակարգերին` նպատակ ունենալով հայտարարված մրցույթներում ապահովել իրենց կողմից հովանավորվող առևտրային կազմակերպության հաղթանակը:

Գործի շրջանակներում 2019 թվականի 27-ին հիշյալ պաշտոնատար անձանց մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ մասով և 325-րդ հոդվածի 2-րդ մասով, իսկ նրանց կողմից հովանավորվող տնտեսվարող սուբյեկտի ներկայացուցչին՝ ՀՀ քրեական օրենսգրքի 38-308-րդ հոդվածի 2-րդ մասով և 325-րդ հոդվածի 2-րդ մասով։

Ապրիլի 18-ին հայտնի դարձավ, որ քրեական գործով մեղադրանք է առաջադրվել նաեւ ՊՎԾ պետ Դավիթ Սանասարյանին՝ պաշտոնեական լիազորությունները չարաշահելու համար։ Նրա պաշտոնավարումը ժամանակավորապես դադարեցվել է։ Դավիթ Սանասարյանը առաջադրված մեղադրանքը չի ընդունել՝ պնդելով, որ հարուցված քրեական գործը չունի այլ ելք, քան մեղադրանքի կասեցումը։ Նրա լիազորությունները ժամանակավորապես դադարեցվել են, եւ որպես խափանման միջոց է կիրառվել չհեռանալու մասին ստորագրությունը:

Հավելենք, որ քրեական գործով կալանավորված անձինք այս պահին չկան՝ըստ նախկինում պաշտոնապես տարածված հաղորդագրությունների։

Աղբյուր` Փաստինֆո