Փաստ ինֆո

Վարչական դատարանը 2019թ.-ի հունիսի 6-ին ոչ իրավաչափ է ճանաչել ՍԱՏՄ կառավարման խորհրդի՝ տեսչական մարմնի ղեկավարի թեկնածուների ընտրության գործընթացը։ Սակայն չնայած դատարանի որոշմանը՝ խախտումներով ուղեկցված ընտրության արդյունքում տեսչական մարմնի ղեկավար նշանակված Գեորգի Ավետիսյանը կշարունակի պաշտոնավարել. նոր ընտրության հարցն օդում կախված կմնա ևս մեկ տարի, քանի որ  Սննդամթերքի անվտանգության տեսչական մարմինը որոշումը բողոքարկել է Վերաքննիչ դատարան, իսկ նիստը նշանակվել է 10 ամիս  անց՝ 2020 թ. մայիսի 14-ին։

Հիշեցնենք, որ դեռևս 2018թ.-ի հունիսի 20-ին ՍԱՏՄ  պետի թեկնածուի ընտրության և վերջինիս նշանակման համար վարչապետին ներկայացնելու համար անցկացվել է սննդամթերքի անվտանգության տեսչական մարմնի կառավարման խորհրդի նիստ։ Թեկնածուները եղել են երեքը՝ Գեորգի Ավետիսյանը, Արարատ Գյուլումյանը և Գրիգորի Գրիգորյան։ ՀՀ սննդամթերքի անվտանգության տեսչական մարմնի ղեկավարի համար խորհրդի կողմից երաշխավորվել և վարչապետին է ներկայացվել երկու թեկնածու՝ Գեորգի Ավետիսյանը և Արարատ Գյուլումյանը, իսկ երրորդի՝ Գրիգորի Գրիգորյանի  թեկնածությունը մերժվել։ Վերջինս խոսքերով՝ իրեն որեւէ հիմնավորում չի ներկայացվել, թե ինչու չի քննարկվել իր թեկնածությունը՝ չի համապատասխանել պահանջներին, թե ունեցել է ավելի բարձր որակավորում կամ որեւէ այլ պատճառ։

ՍԱՊԾ նախկին պետ, միջազգային փորձագետ Գ.Գրիգորյանի գնահատմամբ՝ վերոնշյալ գործընթացը տեղի է ունեցել ՀՀ Սահմանադրության 50-րդ հոդվածի առաջին մասի, «Վարչարարության հիմունքների և վարչական վարույթի մասին» ՀՀ օրենքի 6-րդ և 7-րդ հոդվածներով նախատեսված իրավանորմերի առերևույթ խախտմամբ  եւ մոտ մեկ տարի առաջ՝  2018թ.-ի օգոստոսի 7-ին դիմել է դատարան։ «Փաստինֆո»-ի հետ զրույցում վերջինս պատմեց, որ ընտրությունն անցել է բազում խախտումներով, չնայած նրան, որ այն հեղափոխությունից հետո առաջին ընտրությունն էր և վկայակոչված էր լինելու արդար ու թափանցիկ։ Նրա  վստահեցմամբ բացակայում էին նաև մրցութային չափանիշները։ Բոլորին նույն հարցերն էին տալիս, ընդ որում ոչ մասնագիտական. «Հիմնականում տալիս էին քաղաքական հարցեր, որոնք ընդհանրապես աղերս չունեին այդ պաշտոնի հետ։ Ասում էին, ինչու է նախկին ռեժիմն ինձ հեռացրել աշխատանքից և նմանատիպ այլ հարցեր», - հավելեց Գրիգորի Գրիգորյանը։ Նա պնդեց, որ խնդիրն այստեղ աշխատանքը չէ, այլ իրավունքների ակնհայտ ոտնահարումը։

Այսպիսով Գրիգորի Գրիգորյանի հայցադիմումը դատարանի 2018թ. օգոստոսի 14-ի որոշմամբ վարույթ է ընդունվել։ Այն մակագրվել է Վարչական դատարանի դատավոր Աղասի Դարբինյանին։ 2019թ.-ի մարտի 5-ի որոշմամբ վարչական գործը նշանակվել է դատաքննության, եւ ամիսներ տեւած դատաքննության արդյունքում դատարանը հիմնավորված է համարել հայցվորի պահանջները։

Դատալեքս դատական տեղեկատվական համակարգից տեղեկացանք, որ  հունիսի 6-ին դատարանը բավարարել է Գրիգոր Գրիգորյանի հայցն ընդդեմ ՍԱՏՄ-ի՝ նշելով, որ խորհրդի նիստն անցկացվել է  ՀՀ օրենսդրությամբ սահմանված պահանջների խախտմամբ։ Մասնավորապես՝ մինչև գործի քննության ավարտը ՍԱՏՄ կառավարման խորհրդի աշխատակարգը հաստատված լինելու մասին որևէ ապացույց   դատարան չի ներկայացվել։ ՍԱՏՄ ստեղծումից հետո աշխատակարգը հաստատելու մասին իրավական ակտ չի հայտնաբերվել նաև իրավական տեղեկատվական Arlis.am կայքում, ուստի դատարանը գտել է, որ առկա է ՀՀ օրենսդրության խախտում։ Դատարանն  արձանագրում է, որ ՍԱՏՄ կառավարման խորհրդի աշխատակարգի բացակայության պայմաններում խորհրդի նիստ հրավիրելը և անցկացնելն օրենքի խախտմամբ է իրականացվել, որի հիմքով էլ բավարարել է  Գրիգոր Գրիգորյանի հայցը։ Սակայն գործադիր առայժմ քայլեր չի ձեռնարկում դատարանի արձանագրած խախտումները վերացնելու ուղղությամբ։

Ինչպես արդեն նշել ենք՝ դատարանի որոշումը բողոքարկվել է վերաքննիչ դատարան, որտեղ այն կլսվի 2020 թվականին միայն։ Գրիգորի Գրիգորյանը «Փաստինֆո»-ի հետ զրույցում նկատեց, որ ողջամիտ չէ մեկ տարի հետո նշանակել բողոքարկումը. «Դա արդեն իրավունքների կոպիտ խախտում է, իրավունքների ոտնահարում։ Ես կոնկրետ խախտման դեպք եմ ներկայացրել։ Ընդ որում մինչ այս էլ նրանք արհեստականորեն հետաձգում էին։ Այս գործընթացն ավելի կարճ կարող էր ընթանալ։ Իմ կարծիքով մեկ տարի հետաձգել են, որ թողնեն ՍԱՏՄ ղեկավարը պաշտոնավարի։ Գոյություն ունի ինչ-որ միտում», - ասաց Գրիգոր Գրիգորյանը։

Լուսանկարում՝ Գրիգոր Գրիգորյանը

Հեղինակ` Հասմիկ Կոշկարյան