Փաստ ինֆո

Հանգստյան օրերին Սևան այցելած մի շարք քաղաքացիներ ահազանգում են Սեւանա լճի գույնի փոփոխման կապակցությամբ։

«Այս ամենը ոչ այլ կերպ, քան էկոլոգիական աղետ անվանելը, հնարավոր չէ: Հազարավոր տոննաներով սիգի և խեցգետնի ապօրինի արդյունահանումը և կենդանական ու բուսական աշխարհին հասցված վնասի համարժեք վերականգնման բացակայության պատճառով Սևանը կորցրել է իր բնականությունը:

Ինձ համար առնվազն տարակուսելի է, որ իրավասու մարմինների կողմից չկա որևէ հստակ ու կոնկրետ մասնագիտական կարծիք՝ Սևանա լճի ներկայիս վիճակի վերաբերյալ:

Ո՞վ պետք է պատասխան տա մեր բնությանը հասցված այս ահռելի վնասի համար և ինչու՞ չեն տալիս...»,- ահազանգել է փաստաբան Նորայր Նորիկյանը՝ հրապարակելով գունափոխված Սեւանի լուսանկարները (տես՝ լուսանկարը)։

Մեկ այլ փաստաբան Երվանդ Վարոսյանն էլ արձանագրել է. «Սևանի հետ կատարվողի վերաբերյալ այդպես էլ հստակ մասնագիտական փորձագիտական եզրակացություն դեռ չտեսանք։ Սակայն արդեն կան լճի վերականգնման «համալիր» ծրագրեր։ Չի բացառվում, որ բուժումը սկսենք առանց ախտորոշման, անունն էլ դնենք Ջրային հեղափոխություն»։

Լճի գունափոխման պատճառների մասին «Փաստինֆո»-ն զրուցել է բնապահպանության նախարարի նախկին տեղակալ Այսեր Ղազարյանի հետ, ում կարծիքով, այդ գունավորումը ստացել է ջրիմուռների ծաղկման արդյունքում դրանցից առանձնացած թիթեղիկներից:

«Ջրիմուռների ծաղկման արդյունքում այդ թիթեղիկները առանձնանալով որոշակի ժամանակահատվածում ջրում ստեղծում են շերտ, որում լույսի ճառագայթների ցրման արդյունքում տեսնում ենք կաթնագույն կամ փիրուզագույն երանգները»:

«Փաստինֆո»-ի հարցին, թե այդ թիթեղիկներն իրենցից վտանգ ներկայացնում են, փորձագետը նշեց , որ այդ թիթեղիկները անվնաս են:

«Այդ թիթեղիկները կարբոնատային են և անվնաս: Բայց հիմա լճում սկսվել է թթվածնաքաղց»:

Այսինքն Սևանը հիմա էլ վտանգավոր է դարձել լճում ապրող կենսաբազմազանության համար: Այսեր Ղազարյանի խոսքով՝ Սևանում ապրող մի շարք օրգանիզմներ ոչնչնացման վտանգի տակ են:

«Սևանում ջրիմուռային գերառատ ծաղկումից հետո լճի ստորին շերտերում պետք է, որ սկսված լինի հիպօքսիայի կամ թթվածնաքաղցի գործընթացը, որի արդյունքում մեծ վնաս է կրելու լճի կենսաբազմազանությունը: Ջրի խոր շերտերում և հատակամերձ հատվածում բնակվող օրգանիզմները, որոնք չեն կարողանալու հեռանալ թթվածնով ավելի հարուստ շերտեր, ամենայն հավանականությամբ ոչնչանալու են»:

Աղբյուր` Փաստինֆո