Փաստ ինֆո

Երևանի ընդհանուր իրավասության դատարանի Կենտրոն և Նորք Մարաշ նստավայրում դատավոր Տաթևիկ Գրիգորյանի նախագահությամբ շարունակվում է կաշառքի մեջ մեղադրվող դատավոր Գագիկ Հեբոյանի և փաստաբան Վահագն Դանիելյանի գործով դատական նիստը։

Նշենք, որ ամբաստանյալ Գագիկ Հեբոյանի հարցաքննությունն ավարտվեց։ Ինչպես արդեն հայտնել ենք, մեղադրող դատախազ Արմեն Չախոյանը միջնորդեց հրապարակել Հեբոյանի նախաքննական ցուցմունքը՝ նշելով, որ դրանում եւ դատարանում տված ցուցմունքում առկա են էական հակասություններ․ «Նախաքննական ցուցմունքում Գագիկ Հեբոյանը ասել է, որ այդ հարցով Բենիկ Հարությունյանին խորհրդակցության չի ուղարկել որեւէ մեկի մոտ, մինչդեռ դատարանի դահլիճում ասաց, որ ուղարկել է Վահագի մոտ, Վահագը ներկա չի եղել, ասել է՝ թող գնա Լիլիթ մոտ»։ Պաշտպանական կողմը առարկեց ներկայացված միջնորդության դեմ, իսկ նախագահող դատավոր Տաթեւիկ Գրիգորյանը միջնորդությունը բավարարեց նույն հիմքով։

«Փաստինֆո»-ի հաղորդմամբ՝ նախաքննական ցուցմունքի հրապարակումից հետո Գագիկ Հեբոյանն ասաց, որ երբ իրեն հարցրել են՝ արդյո՞ք ինքը Բենիկին ուղղորդել է որեւէ մեկի մոտ, ինքը չի հասկացել, թե ուղղորդել ասելով՝ նկատի են ունեցել խորհրդակցության ուղարկելը, այդ պատճառով էլ բացասական պատասխան է տվել։

Հեբոյանի պաշտպան Արմեն Նադիրյանը միջնորդություն ներակայացրեց դատակոչել Հեբոյանի նիստերի քարտուղար Անժելա Հովսեփյանին։ Նշենք, որ նա նույնաբովանդակ միջնորդություն ներակայացրել էր ավելի վաղ, սակայն դատարանը դա թողել էր առանց քննության։ Արմեն Նադիրյանը պնդեց իր դիրքորոշումն առ այն, որ Անժելա Հովսեփյանի ցուցմունքները կարող են արժեքավոր լինել․ «Թե Բենիկ Հարությունյանի, թե Գագիկ Հեբոյանի ցուցմունքներում նշված իրական հանգամանքները հաստատելու կամ հերքելու առումով նա կարող է տեղեկություններ ունել»,-ասաց պաշտպանը։

Մեղադրող դատախազ Արթուր Չախոյանը առարկեց միջնորդության դեմ՝ ասելով, որ միջնորդություն ներկայացնելիս պետք է մատնանշել, թե գործի կոնկրետ որ հանգամանքը բացահայտելու համար է ներկայացվում դա․ «Չնշվեց կոնկրետ հանգամանք, ինձ համար՝ ընդհանուր միջնորդություն էր։ Այս առումով ես կարող եմ կռահել, որ խոսքը գնում է մարտի 1-ին Գագիկ Հեբոյանի եւ Բենիկ Հարությունյանի հանդիպման մասին, որի ընթացքում մեծ հարց չի քննարկվել։ Իսկ ինչ վերաբերում է ցուցմունքների արժանահավատությանը, կարծում եմ՝ ավելի հիմնավոր կլիներ խոսել ոչ թե Բենիկ Հարությունյանի ցուցմունքի արժանահավատության մասին, այլ Հեբոյանի, քանի որ նա դատարանում նշեց, որ հանդիպումը եղել է մարտի 4-ին, բայց գործի նյութերից երեում է, որ վերջին դատական նիստը տեղի է ունեցել մարտի 1-ին, 4-ին նիստ տեղի չի ունեցել»։

Նախագահող դատավոր Տաթեւիկ Գրիգորյանը նշեց, որ Անժելա Հովսեփյանին կարող են հայտնի լինել որոշ տեղեկություններ, մասնավորապես՝ ընդմիջման ընթացքում Բենիկ Հարությունյանի եւ Գագիկ Հեբոյանի միջեւ տեղի ունեցած խոսակցության մասին։  Դատարանը, հաշվի առնելով հանգամանքը, որ վկայի հայտնած տեղեկությունները կարող են էական նշանակություն ունենալ, որոշեց բավարարել միջնորդությունը։

Այդպիսով, դատական նիստը հետաձգվեց, որպեսզի վկան ծանուցվի եւ հրավիրվի դատարան։

Հաջորդ դատական նիստը տեղի կունենա հուլիսի 31-ին՝ ժ․ 12։30-ին։

Հեղինակ` Միլենա Խաչիկյան