Փաստ ինֆո

Քաղաքագետ Աղասի Ենոքյանը կարծիքով՝ գործող իշխանությունները՝ Նիկոլ Փաշինյանի գլխավորությամբ, ճնշում են գործադրում Հրայր Թովմասյանի նկատմամբ, որպեսզի վերջինս հրաժարական տա։

‹‹Քանի որ օրենսդրական այլ մեխանիզմներ չկան Թովմասյանին հրաժարականը պարտադրելու համար, նրանք գնում են անձնական կապեր փնտրելու, կոմպրոմատներ սարքելու ճանապարհով››,-‹‹Փաստինֆո››-ի հետ զրույցում ասաց քաղաքագետը՝ անդրադառնալով մամուլի հրապարակումներին, թե իրավապահներն ուսումնասիրում են Ազգային ժողովում Հրայր Թովմասյանի թույլ տված չարաշահումները:

Այն դիտարկմանը, որ նման ուսումնասիրությունների մասին պաշտոնական աղբյուրները լռում են, այլ ներկայացվում է մամուլի կողմից՝ Ենոքյանը պատասխանեց.

‹‹Պաշտոնապես նման ինֆորմացիա տարածելը ակնհայտորեն կնշանակեր, որ իշխանությունները փորձում են ճնշումներ գործադրել դատարանի վրա: Չենք կարող ասել նման բան իրականում կա թե ոչ, սակայն կարող ենք ասել, որ տրամաբանական է՝ իշխանությունները կփորձեն գնալ այդ քայլին››:

Ենոքյանի խոսքով, ճնշումները բավականին մեծ պետք է լինեն, որպեսզի Թովմասյանը հրաժարական տա:

Հարցին, որ ՍԴ նախագահն իր վերջին հարցազրույցում հայտարարել էր՝ դատարանների նկատմամբ ճնշում գործադրելու մասին տեղեկությունները հաստատվելու դեպքում դրա կիրառողները պատասխանատվության կենթարկվեն անկախ պաշտոնից, իսկ Նիկոլ Փաշինյանն էլ մինչ այդ դատարաններն արգելափակելու կոչ էր արել, ըստ էության ճնշում գործադրելով դատարանների վրա, հնարավո՞ր է մամուլի միջոցով Փաշինյանը պատասխանում է Թովմասյանի հայտարարությանը, քաղաքագետը պատասխանեց.

‹‹Դեպք է եղել, որ դատավորի նկատմամբ ճնշում են գործադրել և թույլ չեն տվել՝ մտնի դատարան, սրա հետ կապված դիմում է եղել դատախազություն, որպեսզի քրեական գործ հարուցվի, սակայն դատախազությունը մերժել է, այսինքն` դատախազության մակարդակով արդեն կարող են կասեցնել նման միտումը››:

Ենոքյանն ընդգծեց, որ ՍԴ նախագահը ներկայիս իշխանությունների հետ նախկինում համագործակցել է, և երբ հոկտեմբերի 2-ին ԱԺ կանոնակարգ սահմանադրական օրենքում փոփոխությունների նախագիծն ընդունվել ու ուղարկվել է ՍԴ, Թովմասյանը ժամանակ է ձգձգել՝ թույլ տալով Փաշինյանին էթիկայի տրամաբանությունը հասցնել ավարտին:

‹‹Եթե Թովմասյանին ձեռք չտային, նա նորմալ կաշխատեր այս իշխանությունների հետ,սակայն Նիկոլ Փաշինյանն, անպայման, որոշել է՝ պետք է ՍԴ նախագահ դառնա Վահե Գրիգորյանը: Սա է ամբողջ հարցը, որ արդեն ինստիտուտներով չեն աշխատում, այլ անձերով››,-նշեց Ենոքյանը:

Քաղաքագետի խոսքով, Թովմասյանը վաղուց արդեն հանրապետական չէ, և եթե նման տրամաբանությամբ առաջնորդվենք, կստացվի, որ հանրապետական է նաև գլխավոր դատախազը, որը նույնպես նշանակվել է ՀՀԿ-ի կողմից, Փաշինյանը եւս ընտրվել է ԱԺ-ի կողմից, որի մեծամասնությունը ՀՀԿ-ն է եղել:

Հեղինակ` Սոնա Գեւորգյան