Փաստ ինֆո

ՀՀ երկրորդ նախագահ Ռոբերտ Քոչարյանի որդու՝ Լևոն Քոչարյանի, կարծիքով, Վերաքննիչ դատարան ներկայացրած դատախազների բողոքն անհիմն էր:
Հիշեցնենք, որ Վերաքննիչ դատարանը քիչ առաջ մերժեց Ռոբերտ Քոչարյանի գույքի վրա կալանքի գործով Երեւանի ընդհանուր իրավասության դատարանի որոշման դեմ դատախազների բողոքը։

Լևոն Քոչարյանը լրագրողների հետ զրույցում ասաց, որ իրենք բավարարված են այդ որոշմամբ, սակայն վերջնական բավարարված կլինեն, երբ վերացվեն բոլոր խախտումները, որ թույլ են տրվել այս մեկ տարվա ընթացքում:

‹‹Երբ 1 տարի առաջ սրա մասին բարձրաձայնում էինք, ինչ-որ մարդիկ կարող է լավ չէին պատկերացնում ի՞նչի մասին է խոսքը, և այսօր արդեն ակնհայտ է դառնում այն ապօրինությունների շարքը, որ արվել է համատարած բոլոր փուլերում››,-ասաց Լևոն Քոչարյանը:

Նա խախտում համարեց իր հոր գույքի և հաշիվների վրա դրված կալանքը, ապա ավելացրեց, որ հոկտեմբերին իր և եղբոր հաշիվների վրա նույնպես անհիմն կալանք է դրված եղել, իրենք բողոքարկել են դատախազին, իր մասով կալանքը հեռացվել է, սակայն եղբոր՝ Սեդրակ Քոչարյանի մասով՝ ոչ:

‹‹Բայց փաստորեն 4-5 ամիս նույնիսկ իմ հաշիվներն ու գույքն են եղել կալանքի տակ՝ բացարձակ ապօրինի հիմքով: Հիմնավորումը եղել է, այն ինչ դուք ունեք՝ չենք հավատում ձերն է, դա Ռ. Քոչարյանինն է››,-ասաց Քոչարյանի տղան:

Լևոն Քոչարյանը հայտնեց, որ իրենք ֆինանսական խնդիրներ չունեն, իսկ իր հոր հայտարարությունը, թե հարազատներն ու մերձավորներն են իրեն օգնում ֆինանսական հարցերում՝ Լևոն Քոչարյանը պարզաբանեց, ասելով, որ խոսքը եղել է այն մասին, որ Քոչարյանը կցանկանար իր միջոցներով ապահովել իր պաշտպանությունը:

Հարցին, թե ում միջոցներով է ֆինանսավորումը կատարվում, Լևոն Քոչարյանը պատասխանեց. ‹‹Ճիշտն ասած չգիտեմ, ես չեմ››:

Հեղինակ` Սոնա Գեւորգյան