Փաստ ինֆո

Ռոբերտ Քոչարյանի փաստաբան Հովհաննես Խուդոյանը մտավախություն ունի, որ Ռոբերտ Քոչարյանի ամբողջ գույքի վրա արգելանք դնելով քննիչները նպատակ են ունեցել իրավունքի անհամաչափ սահմանափակման, իսկ ներկայումս ամեն գնով փորձում են դա արդարացնել։

Ինչպես արդեն տեղեկացրել ենք՝ վերաքննիչ դատարանում այսօր տեղի է ունեցել ՀՀ երկրորդ նախագահ Ռոբերտ Քոչարյանի գույքի վրա դրված կալանքի վերաբերյալ դատավոր Աննա Դանիբեկյանի կայացրած որոշման դեմ դատախազության կողմից բերված բողոքի քննությունը։

Դատախազ Պետրոս Պետրոսյանն այսօր դատարանում հայտարարել է, որ քննիչը Ռոբերտ Քոչարյանի գույքի վրա կալանք է դրվել՝ հաշվի առնելով հնարավոր քաղաքացիական հայցը և դատական ծախսը։ Ըստ նրա՝ արգելանք դնելիս չեն իմացել, թե որքան կկազմեն դատական ծախսերը։

Փաստաբանի դիտարկմամբ՝ քննիչի՝ գույքի վրա կալանք դնելու որոշման մեջ պետք է նշված լինի գումարի այն չափը, որը նախատեսվում է ծախսել դատական պրոցեսների վրա։ «Նշվում է, որ քննիչը ի սկզբանե չէր կարող իմանալ ինչ գույք կա, դա չի նշանակում, որ քննիչի որոշումը չպիտի պարունակի հիմնավորում, թե գույքի որ մասի վրա և ինչ չափի կալանք պետք է դրվի։ Ըստ օրենքի քննիչի որոշման մեջ պետք է նշված լինի գումարի այն չափը, որը նախատեսում են դատական ծախսերի համար»,-հայտարարեց փաստաբան Խուդոյանը։

Միաժամանակ նշվեց, որ Ռոբերտ Քոչարյանի տանից առգրավված զենքերը օրինական են եղել, սակայն դրանք քննությունից հետո չեն վերադարձվել։ Դատախազների պնդմամբ՝ պատճառն այն է, որ Քոչարյանը կալանքի տակ է, սակայն ՀՀ երկրորդ նախագահն էլ, իր պաշտպանն էլ պնդում են, որ դրանք կարող էին վերադարձվել կամ տուն, որտեղից առգրավվել էին, կամ Քոչարյանին, այն ընթացքում, երբ ազատության մեջ էր։

Աղբյուր` Փաստինֆո