Փաստ ինֆո

Դատավորներ Մխիթար Պապոյանի, Դավիթ Գրիգորյանի եւ փաստաբան Ալեքսանդր Սիրունյանի հաղորդումների հիման վրա հարուցված քրեական գործերը միացվել են մեկ վարույթում։ Այս մասին «Փաստինֆո»-ի գրավոր հարցմանն ի պատասխան՝ տեղեկացրեց Ազգային անվտանգության ծառայության Քննչական դեպարտամենտի պետ, գնդապետ Ա.Աղաջանյանը։

Հիշեցնենք, որ ՀՀ վերաքննիչ քրեական դատարանի դատավոր Մխիթար Պապոյանի հաղորդման հիման վրա ԱԱԾ-ում հարուցվել է քրեական գործ ՀՀ ՔՕ-ի 344-րդ հոդվածի 2-րդ մասով, այն է` դատավորին զրպարտելը, ինչը կատարվել է դատավորի նկատմամբ՝ կապված գործը կամ նյութերը դատարանում քննելու հետ։ Նույն հոդվածով քրեական գործ էր հարուցվել նաեւ Երեւանի ընդհանուր իրավասության դատարանի դատավոր Դավիթ Գրիգորյանի հաղորդման հիման վրա։ Հաղորդումներ էր ներկայացրել նաեւ փաստաբան Ալեքսանդր Սիրունյանը, որոնք Դատախազությունն ուղարկել էր ԱԱԾ։

«Փաստինֆո»-ն առանձին հարցումներով դիմել էր Ազգային անվտանգության ծառայություն՝ հետաքրքրելով, թե ինչ փուլում են նշված հաղորդումների հիման վրա հարուցված քրեական գործերը։ Մասնավորապես, խնդրել էինք նշել, թե քրեական գործերով որպես մեղադրյալ ներգրավված քանի անձ կա, եւ ինչում են նրանք մեղադրվում։ Խնդրել էինք նշել նաեւ՝ արդյո՞ք հարցաքննվել են հիշյալ անձինք, եթե այո, ապա ի՞նչ կարգավիճակով, եւ կա՞ն արդյոք որպես տուժող ներգրավված անձինք։

Մեր երեք հարցումներին ԱԱԾ-ից տրվել է մեկ միասնական պատասխան։ Մասնավորապես, ասվում է, որ ՀՀ վերաքննիչ քրեական դատարանի դատավոր Մխիթար Պապոյանի, Երևան քաղաքի ընդհանուր իրավասության դատարանի դատավոր Դավիթ Գրիգորյանի և փաստաբան Ալեքսանդր Սիրունյանի հաղորդումների հիման վրա ՀՀ ազգային անվտանգության ծառայության քննչական դեպարտամենտում ՀՀ քրեական օրենսգրքի 344-րդ հոդվածի 2-րդ մասով հարուցված քրեական գործի վերաբերյալ հնարավոր չէ տրամադրել տեղեկություններ՝ հաշվի առնելով ՀՀ քրեական դատավարության օրենսգրքի 201-րդ հոդվածով նախատեսված նախնական քննության տվյալների հրապարակման անթույլատրելիությունը։

ԱԱԾ-ն միաժամանակ տեղեկացնում է, որ հետագայում նման խնդրանքով դիմելու դեպքում՝ նախնական քննության տվյալների հրապարակման անթույլատրելիությունը վերանալու պարագայում, հնարավոր է, որ տրամադրվեն տեղեկություններ:

Ավելի վաղ հայտնել ենք, որ Դավիթ Գրիգորյանը մայիսի 22-ին հաղորդում էր ներկայացրել ՀՀ գլխավոր դատախազին՝ պահանջելով քրեական գործ հարուցել կաշառք տալու-ստանալու կամ իր նկատմամբ սուտ մատնություն կատարելու դեպքի առթիվ։ Ենթադրյալ կաշառքի մասին գրառումներով էր հանդես եկել փաստաբան Ալեքսանդր Սիրունյանը։  Մայիսի 22-ին՝ դատավոր Դավիթ Գրիգորյանի հաղորդում ներկայացնելու հաջորդ օրը, հաղորդում էր ներկայացրել նաեւ փաստաբան Ալիկ Սիրունյանը՝ նշելով, որ Ռոբերտ Քոչարյանի և այլոց գործով դատավոր Դավիթ Գրիգորյանի կողմից կայացված դատական ակտն ապօրինի է և կայացվել է դատավորի կողմից իր լիազորությունների ակնհայտ խախտմամբ։ Ինչ վերաբերում է Մխիթար Պապոյանի հաղորդմանը, վերջինս այն ներկայացրեց դատավոր Դավիթ Գրիգորյանի` Ռոբերտ Քոչարյանի գործով կայացրած որոշումից հետո, երբ մամուլում տեղեկություններ էին տարածվել, թե այդ որոշումը գրվել է  դատավորներ Մխիթար Պապոյանի, Վազգեն Ռշտունու եւ Արշակ Վարդանյանի կողմից:

Դատավորներ Պապոյանն ու Ռշտունին «Փաստինֆո»-ին հայտնել են, որ ԱԱԾ-ում քննվող քրեական գործով չեն հարցաքննվել։

Հեղինակ` Միլենա Խաչիկյան