Փաստ ինֆո

ԱԺ վեցերորդ գումարման պատգամավոր Միհրան Պողոսյանը նախքան պատգամավորի լիազորությունները ստանձնելը՝ 2017թ. մայիսի 18, հայտարարագրել է հասարակական նշանակության 6 շինություն, արտադրական նշանակության շինություն, ավտոտնակ, 153 հազ դոլար և 32 մլն դրամ։ Այս մասին  «Փաստինֆո»-ն տեղեկանում է Բարձրաստիճան պաշտոնատար անձանց էթիկայի հանձնաժողովի կայքէջից։

Նշենք, որ նախքան պատգամավոր ընտրվելը, Միհրան Պողոսյանը 2008-2016 թթ. եղել է ՀՀ դատական ակտերի գլխավոր հարկադիր կատարող։ Այդ ժամանակահատվածում՝ մասնավորապես 2015թ.-ին, նախկին պատգամավորի եկամուտը գերազանցել է 22 մլն դրամը, որից 10 մլնը վարձակալության դիմաց ստացված վճարն է, իսկ 12.3 մլն դրամը՝ աշխատանքի վարձատրությունը։

«Հայաստանի Հանրապետական կուսակցություն» խմբակցության պատգամավորը 2018թ.-ին 5 մլն դրամով վաճառել է արտադրական նշանակության շինությունը և 581 մլն 400 հազ դրամով վաճառել հասարակական նշանակության շինությունը։ Նույն տարում ձեռք է բերել 20.7 մլն դրամ արժողությամբ հողամաս և 13 մլն դրամ արժողությամբ Range Rover Supercharged 5.0 Vogue մակնիշի ավտոմեքենա։ Նախորդ տարի Միհրան Պողոսյանի եկամուտը կազմել է 647 մլն 574 հազ դրամ։

Հատկանշական է 2019թ.-ին Միհրան Պողոսյանի հայտարարագրած անշարժ գույքը։ Նա պաշտոնը ստանձնելու՝ 2017թ.-ի և այն դադարեցնելու միջակայքում ընկած երկու տարիների ընթացքում ձեռք է բերել հասարակական նշանակության ևս 3 շինություն և հողամասի վրա կառուցված երկու բնակելի տուն, սակայն 2 տարիների ընթացքում նրա ներկայացրած հայտարարագրերում անշարժ գույքի օտարման կամ ձեռքբերման նման որևէ տվյալ առկա չէ։ Նախկին պատգամավորի ձեռք բերած և օտարած անշարժ գույքի մասին տեղեկություն առկա է նրա 2018թ.-ի հայտարարագրում, որտեղ որպես նոր ձեռք բերված անշարժ գույք նշված է միայն 20.7 մլն դրամ արժողությամբ հողամասը։

Հիշեցնենք, որ Միհրան Պողոսյանին մեղադրանք է առաջադրվել Քրեական օրենսգրքի 179-րդ հոդվածի 3-րդ մասի 1-ին կետով և 308-րդ հոդվածի 2-րդ մասով՝ հանրորեն վտանգավոր այն արարքների կատարման համար, որ նա, օգտագործելով պաշտոնեական դիրքը, վատնման եղանակով առանձնապես խոշոր չափերով գույք է հափշտակել և չարաշահել իր պաշտոնեական լիազորությունները։

Աղբյուր` Փաստինֆո