Փաստ ինֆո

Կաշառքի մեջ մեղադրվող դատավոր Գագիկ Հեբոյանի հաղորդման հիման վրա հարուցված քրեական գործը կարճվել է։ Այս մասին «Փաստինֆո»-ի հարցմանն ի պատասխան՝ տեղեկացրեց Հատուկ քննչական ծառայության մամուլի խոսնակ Մարինա Օհանջանյանը։

Ավելի վաղ հայտնել ենք, որ  Գագիկ Հեբոյանը հանցագործության մասին հաղորդում է ներկայացրել Հատուկ քննչական ծառայություն, որտեղ  հարուցվել էր քրեական գործ ՀՀ ՔՕ-ի 309–րդ հոդվածի 2–րդ մասի հատկանիշներով, այն է՝ բռնության գործադրմամբ պաշտոնեական լիազորությունները անցնելը. «Մայիսի 27-ի դատական նիստին ինձ բռնի ուժով են բերել դատարան, ես այդ մասին Ձեզ հայտնել եմ, և ցույց տվել վնասվածքներս, իսկ Դուք թույլ չեք տվել վերադառնալ խուց, ինչի իրավունքը ես ունեի»,- այս մասին դատարանի դահլիճում հայտարարել էր Գագիկ Հեբոյանը՝ դիմելով նախագահող դատավոր Տաթեւիկ Գրիգորյանին ։

Մարինա Օհանջանյանը «Փաստինֆո»-ին տեղեկացրեց, որ քրեական գործը կարճվել է հանցակազմի բացակայության հիմքով։ Մինչ այդ քրեական գործով որեւէ մեկը որպես մեղադրյալ ներգրավված չի եղել, իսկ Գագիկ Հեբոյանն ունեցել է տուժողի կարգավիճակ։

Հիշեցնենք, որ Գագիկ Հեբոյանի վերաբերյալ մեկ այլ քրեական գործ այժմ դատարանում է։ Նա մեղադրվում է առանձնապես խոշոր չափերով կաշառք ստանալու համար՝ ՀՀ քրեական օրենսգրքի 311-րդ հոդվածի 4-րդ մասի 2-րդ և 3-րդ կետերով, իսկ փաստաբան Վահագն Դանիելյանը՝ դատավորի կողմից առանձնապես խոշոր չափերով կաշառք ստանալուն օժանդակելու համար՝ ՀՀ քրեական օրենսգրքի 38-311-րդ հոդվածի 4-րդ մասի 2-րդ և 3-րդ կետերով:

Գ. Հեբոյանի նկատմամբ որպես խափանման միջոց է ընտրված կալանավորումը։

Հեղինակ` Միլենա Խաչիկյան