Փաստ ինֆո

Համահայկական ազգային համաձայնությունն Իջևանի դեպքերի հետ կապված  այսօր հայտարարություն է տարածել։ Հայտարարությունում բարձրացվում է հետևյալ հարցը, թե ինչու՞ ՀՀ շրջակա միջավայրի նախարարության անտառային կոմիտեին, մինչ օրս, անտառի վերականգնման, ծառատնկման ու խնամքի համար չի տրամադրվել 2019թ. պետբյուջեով նախատեսված 425 միլիոն դրամը, որը կարող էր ստեղծել առնվազն 500 աշխատատեղ այն անձանց համար, որոնք ցույցի են դիմել. «Ինչու՞ մինչև այժմ անտառակառավարման պլանների կազմման համար պետբյուջեից չի տրամադրվել նախատեսված 113 միլիոն դրամը։ Ավելին, ՀՀ անկախացումից ի վեր ՀՀ անտառային էկոհամակարգն ընդհանրապես չի գույքագրվել ու վերածվել է բացառապես բնափայտի մթերման աղբյուրի, և կարծես թե պետությունը շահագրգռված չէ բացահայտելու մեր անտառների իրական վիճակը», - նշված է հայտարարությունում։

Համահայկական ազգային համաձայնությունը խոստորեն դատապարտում է Հայաստանի բնությանը հասցվող յուրաքանչյուր վնասարարություն, սակայն միաժամանակ դատապարտելի է համարում Իջևանում ՀՀ պետական մարմինների կողմից բողոքի գործողության դուրս եկած քաղաքացիների նկատմամբ ոստիկանական ուժի անհարիր կիրառման ձևերը. «դիմակավորների և երբեմն անհամազգեստ անձանց ներգրավումը, գիշերային ձերբակալությունները, կալանված մարդկանց գտնվելու վայրը գաղտնի պահելը և այլն», - գրված է հայտարարությունում։

Համահայական ազգային համաձայնությունը հայտարարում է՝

«Վե՛րջ տալ անտառի նկատմամբ ժողովրդի սեփականության իրավունքի ոտնահարմանը։ ՀՀ Ազգային ժողովը պարտավո՛ր է համապատասխանեցնել ՀՀ անտառային օրենսդրությունը ՀՀ Անկախության Հռչակագրով սահմանված անտառային ռեսուրսների նկատմամբ ժողովրդի սեփականության իրավունքի հաստատագրմանը։ Հայաստանի Հանրապետության օրենսդիր և գործադիր ատյաններում պետք է անհապաղ նախաձեռնել անտառի պահպանմանը նպատակաուղղված իրատեսական, գործուն ու խթանող կառավարչական միջոցառումներ, ապահովելով բնակիչների մասնակցությունը, և բացառել  ոստիկանության օգտագործումը որպես սաստող մահակ սեփական ժողովրդի դեմ, ինչպես եղել է Հայաստանի անկախացումից մինչ օրս»։

Հիշեցնենք, որ հուլիսի 17-ին՝ Իջևանում, «փայտի գործով» զբաղվող 600 հոգի փակել էին միջպետական ճանապարհը՝ պահանջելով անտառահատման արգելքի վերացում, արդեն հատված անտառանյութն անտառից դուրս բերելու իրավունք և հանդիպում այն պաշտոնյայի հետ, որն արգելել է անտառից փայտ դուրս բերել։

Ավելի վաղ Տավուշի մարզպետ Հայկ Չոբանյանը «Փաստինֆո»-ի հետ զրույցում ասել էր, որ այս պահին 85 հոգի դիմել է իրենց, որոնց արդեն աշխատանք են առաջարկում։ Նա նաև հավելեց, որ Տավուշում առկա է 322 աշխատատեղ։ Հայկ Չոբանյանի խոսքով Իջևանում այժմ հանգիստ և համեմատաբար ավելի առողջ մթնոլորտ է, քանի որ անտառներն այլևս չեն կտրում։

Աղբյուր` Փաստինֆո