Փաստ ինֆո

ԱԺ «Բարգավաճ Հայաստան›› խմբակցության պատգամավոր Նաիրա Զոհրաբյանը կարծում է՝ մամուլի հրապարակումները, թե ՍԴ նախագահ Հրայր Թովմասյանի նախկին պաշտոններում թույլ տված ենթադրյալ չարաշահումներն իրավապահների ուշադրության կենտրոնում են, անմիջական կապ ունեն ՍԴ-ի շուրջ ստեղծված իրավիճակի հետ:

‹‹Նոստրադամուսը պետք չէ լինել հասկանալու համար, որ խնդիրը կապված է ՍԴ-ի շուրջ ստեղծված թնջուկի հետ: Իրականում եղել են չարաշահումներ, թե ոչ` կպարզեն իրավապահները, բայց որ այստեղ հստակ է ուղիղ, օրգանական, կենսաբանական կապը ՍԴ-ի շուրջ ստեղծված թնջուկի հետ, դա միանշանակ է››,-‹‹Փաստինֆո››-ի հետ զրույցում ասաց ԱԺ պատգամավորը:

Նա ընդունում է, որ դատական համակարգը հեղափոխական բարեփոխումների կարիք ունի, բայց կարեւորեց նաեւ եղանակը:

‹‹Միանշանակ է, որ դատաիրավական համակարգը ավելի քան 20  տարի ճզմված է եղել նախորդ իշխանությունների կրունկի տակ, բայց ես չեմ ցանկանա, որ մեր նոր դատաիրավական համակարգը, որի բարեփոխումը մենք ուզում ենք, հիմա էլ ճզմված լինի Նիկոլ Փաշինյանի կրունկի տակ››,-ասաց Զոհրաբյանը։

Պատգամավորն ընդգծեց, որ այս պահին դատական համակարգի փոփոխությունների գեներացիան ամբողջապես գտնվում է քաղաքական դաշտում, և այդ կերպ հարցը լուծում չի կարող ունենալ:

Նա  խուսափեց ասել, որ դատական համակարգում բոլորն աշխատել են ստրուկի հոգեբանությամբ, քանի որ դրանով կվիրավորի ազնիվ, անաչառ դատավորներին, ովքեր պահպանել են իրենց դեմքը:

‹‹Փաստինֆո››-ի այն դիտարկմանը, որ ՍԴ նախագահն իր վերջին հարցազրույցում հայտարարել էր, որ դատարանների նկատմամբ ճնշումները հաստատվելու դեպքում դրա գործադրողները պատասխանատվության կենթարկվեն անկախ պաշտոնից, իսկ Նիկոլ Փաշինյանն էլ մինչ այդ դատարաններն արգելափակելու կոչ էր արել՝ ըստ էության ճնշում գործադրելով դատարանների վրա, հնարավո՞ր է մամուլի միջոցով Փաշինյանը պատասխանում է Թովմասյանի հայտարարությանը, Զոհրաբյանը պատասխանեց. ‹‹Չեմ կարող ասել, որովհետև Նիկոլ Փաշինյան-Հրայր Թովմասյան դեբատին հանգամանալից չեմ հետևել, ընդամենը իմ տեսակետն ասել եմ դեռ 1,5 ամիս առաջ՝ մինչև Վենետիկի հանձնաժողովի եզրակացությունը: Երբ Ստրասբուրգում հանդիպել եմ Վենետիկի հանձնաժողովի փորձագետներին, առաջիններից մեկն եմ եղել, որ իրազեկվել եմ, իրենք բավականին մտահոգիչ են համարում ՍԴ-ի, դատաիրավական բարեփոխումների, դատաիրավական համակարգի շուրջ ընթացող գործընթացները››,-ասաց պատգամավորն ու ավելացրեց, որ իր մտահոգություններով կիսվել է իշխանության ներկայացուցիչների հետ ու ասել՝ եթե շարունակեն քաղաքական ‹‹պրեսինգը››, ապա միջազգային կառույցների արձագանքը շատ կոշտ կլինի:

‹‹Կոշտ արձագանքը  չուշացավ, և եթե շարունակվի կրկին ‹‹քաղաքական քլունգի›› միջոցով փորձել  հանգուցալուծել ՍԵԴ-ի թնջուկը, մեկը մյուսի հետևից լինելու են միջազգային տարբեր կառույցների կոշտ գնահատականները››,-նշեց Նաիրա Զոհրաբյանը:

Հեղինակ` Սոնա Գեւորգյան