Փաստ ինֆո

‹‹Սպայական ծառայությունը կամային ամենաբարձր հատկանիշներ պահանջող ծառայության տեսակ է, որովհետև պահանջում է կամք անվերապահ և առանց քննարկման ի կատար ածել հրամանները, անվերապահ և առանց քննարկման ապահովել սեփական հրամանների ի կատար ածումը››,-այսօր ռազմաուսումնական հաստատությունների շրջանավարտների ավարտական միջոցառմանն ասաց ՀՀ վարչապետ Նիկոլ Փաշինյանը:

Նա ընդգծեց, որ սպայական գործունեությունը պահանջում է բարոյական, ինտելեկտուալ և հոգեբանական ահռելի ուժ:

Փաշինյանը նշեց, որ հրամանատար լինելը նշանակում է սեփական ենթականերին, երբեմն, այնպիսի գործողությունների ուղարկել, որտեղից վերադառնալու հավանականությունը մեծ չէ:

‹‹Լինել սպա, նշանակում է անվերապահորեն ստանձնել այդպիսի հանձնարարությունների կատարումը , որոնցից վերադառնալու հավանականությունը մեծ չէ: Սա նշանակում է, որ յուրաքանչյուր հրամանի ձևակերպում առանձնակի պատասխանատվություն է պահանջում ձեզնից յուրաքանչյուրից, որովհետև հրամանները պետք է լինեն խելամիտ, արդարացված, իրավիճակի ճշգրիտ գնահատականից բխող և այնպիսին, որ ծառայեն Հայաստանի զինված ուժերին, ՀՀ-ին և ժողովրդին››,-ասաց վարչապետը:

Նրա խոսքով, սպայի հեղինակությունը շատ ավելի մեծ պետք է լինի, քան նրա ուսադիրների զինվորական նշանակությունը:

Փաշինյանը կարևորեց կանանց ներգրավվածությունը զինվորական աշխատանքում և շեշտեց, որ այն վերափոխման կարևորագույն ցուցիչ է, քանի որ ՀՀ-ում կանայք հսկայական ներուժ ունեն ու բնակչության մեծամասնությունն են:

Վարչապետն ընդգծեց, որ հարկավոր է այնպիսի  պետություն, զինված ուժեր, հասարակություն, որ բոլոր պոտենցիալ հակառակորդները հասկանան՝ Հայաստանի հետ կռվի բռնվելն իմաստ չունի, և դրա միակ արդյունքը թշնամու, հակառակորդների պարտությունն է:

‹‹Անկախ նրանից, թե ինչ ուսադիրներ ենք կրում, մենք կրում ենք մեր ժողովրդի, պատմության, նախնիների, սերունդների ուսերին դրած ուսադիրները: Կեցցենք մենք, որ փառքով ենք կրում և փառքով ենք կրելու այդ ուսադիրները››,-ասաց Նիկոլ Փաշինյանը:

Մանրամասնները՝  տեսանյութում

Աղբյուր` Փաստինֆո