Փաստ ինֆո

«2018թ. հունիս-հուլիս ամիսները «Սեքյուրիթի դրիմ» ընկերության համար բարդ ամիսներ էին՝ հարուցված քրեական գործ, ստուգումներ, խուզարկություններ, ֆինանսական բարդություններ։ Առանց որևէ պայմանների համաձայնեցի ստանձնել տնօրենի պարտականությունները։ Այդ ընթացքում աշխատանքային պայմանագիր չեմ ունեցել և 8 ամիս կատարածս աշխատանքի համար չեմ վճարվել», - «Փաստինֆո»-ի հետ զրույցում ասաց «Սեքյուրիթի դրիմ» ընկերության նախկին տնօրեն Արամ Ղլեչյանը։

Նշենք, որ այսօր Երևանի ընդհանուր իրավասության դատարանում նախատեսված էին դատական նիստերը՝ ընկերության աշխատակիցներ Հայկ Հակոբյանի, Արթուր Գալստյանի և տնօրեն Արամ Ղլեչյանի ընդդեմ «Սեքյուրիթի դրիմ» ընկերության ներկայացրած հայցադիմումների գործերով։ Նրանք պահանջում են անվավեր ճանաչել իրենց ազատելու մասին հրամանները, վերականգնել նախկին աշխատանքին և հարկադիր պարապուրդի ամբողջ ժամանակահատվածի համար բռնագանձել միջին աշխատավարձ։

Հայցվոր կողմի փաստաբան Արամ Ղլեչյանը միջնորդություն ներկայացրեց՝ որպես վկաներ հրավիրելու «Սպեցնազ Ռ» ՍՊԸ-ի աշխատակիցներին. ««Սեքյուրիթի դրիմ» ընկերությունը 2018թ.-ի դեկտեմբերից պայմանագրով պահնորդական ծառայություններ էր ստանում «Սպեցնազ Ռ» ՍՊԸ-ից։ Բնականաբար նրանց պահնորդները, իրականացնելով ծառայություն «Սեքյուրիթի դրիմ»-ի գրասենյակներում, շատ լավ տեղյակ էին ընկերությունում տեղի ունեցող գործողություններին։ Վեճն արդարացի լուծելու նպատակով այդ անձանց ցուցմունքները դատարանի համար էական կլինեն», - ասաց Արամ Ղլեչյանը։
Պատասխանող կողմը, սակայն, նկատեց, որ «Սպեցնազ Ռ» ընկերության աշխատակիցների վկայություններն արժանահավատ չեն կարող լինել, քանի որ այդ ընկերության հետ «Սեքյուրիթի դրիմ»-ը դատական վեճ ունի։

Պատասխանող կողմի ներկայացուցիչ Տիգրան Գրիգորյանը «Փաստինֆո»-ի հետ զրույցում տեղեկացրեց, որ «Սեքյուրիթի դրիմ»-ը, օգտվելով իր պայմանագրային և քաղաքացիաիրավական օրենսդրությունից բխող իրավունքից, «Սպեցնազ Ռ» ՍՊԸ-ի հետ լուծել է պայմանագիրը. «Ընկերությունը համապատասխան պահանջ ունի «Սեքյուրիթի դրիմ»-ի դեմ, որը գտնվում է դատարանում։ Չնայած իմ ունեցած վերջին տեղեկություններով, նրանց հայցադիմումը վերադարձված է», - ասաց Տիգրան Գրիգորյանը։

Արամ Ղլեչյանը դատարանին խնդրեց հետաձգել իր իսկ միջնորդության քննարկումը՝ հարցաքննելու համար իրենց կողմից առաջարկվող վկաների մասին հավելյալ տեղեկություններ տրամադրելու վերաբերյալ։ Դատարանը որոշեց հաջորդ դատական նիստը նշանակել հոկտեմբերի 29-ին։
Ի դեպ, հայցվոր կողմը դատարանին ներկայացրեց նաև լրատվամիջոցների տեսանյութերը, որոնք փաստաբան Արամ Ղլեչյանի խոսքով հստակ ցույց են տալիս, թե 2019թ. մարտի 1-ին բողոքի գործողությունները երբ են սկսվել և երբ են ավարտվել։ Պատասխանող կողմը չառարկեց, որպեսզի տեսանյութերը գործին կցվեն, սակայն նկատեց, որ այն վերաբերելի չէ գործին, քանի որ չի ապացուցում, որ աշխատակիցները նշված ժամանակահատվածում եղել են աշխատավայրում և կատարել են աշխատանքային պարտավորությունները։

Հիշեցնենք, որ մարտի 1-ին «Սեքյուրիթի դրիմ» ընկերության աշխատակիցները բողոքի ակցիա էին իրականացրել, որից օրեր անց՝ մարտի 5-ին, արգելափակվել են աշխատակիցների էլեկտրոնային անցագրերը։ Աշխատակիցների խոսքով վերջիններս անհիմն են աշխատանքից հեռացվել։

Հեղինակ` Հասմիկ Կոշկարյան