Փաստ ինֆո

Ո՛չ կուսակցական պատկանելությունը, ո՛չ նախկինում այս կամ այն թիմի հետ զբաղեցրած պաշտոնը քաղաքապետ Հայկ Մարությանի համար կարևոր գործոն չեն կադրային ընտրության հարցում,- «Փաստինֆո»-ի հետ զրույցում ասաց քաղաքապետի մամուլի խոսնակ Հակոբ Կարապետյանը՝ մեկնաբանելով մամուլի այն հրապարակումները, որ Հայկ Մարությանը 40 տոկոսով «սպիտակեցրել է» աշխատակազմը: Խոսնակը նաև նշեց, որ չգիտի, թե այդ ինչ հաշվարկներ են ու նման տվյալների չի տիրապետում:

«Այդ 40 տոկոսը ի՞նչ հաշվարկների հիման վրա է գրվել: Ես չեմ մեկնաբանի այդ հրապարակումը , քանի որ նման տվյալների չեմ տիրապետում, իսկ ինչ վերաբերում է «սպիտակեցնելուն» կամ այլ գունավորումներ տալուն, ապա պրակտիկան ցույց է տալիս , որ ո՛չ կուսակցական պատկանելությունը, ո՛չ նախկինում այս կամ այն թիմի հետ զբաղեցրած պաշտոնը քաղաքապետ Հայկ Մարությանի համար կարևոր գործոն չեն կադրային ընտրության հարցում:

Կարևոր գործոն է կոնկրետ տվյալ պաշտոնում պաշտոնավարելու հմտությունները և գիտելիքները , ինչպես նաև համապատասխանությունը այն պայմաններին, որոնք առաջ է քաշել քաղաքապետը, այն է՝ աշխատել բացառապես օրինականության սահմաններում հանուն քաղաքի շահի: Եթե պաշտոնյաները, թեկնածուները համապատասխանում են այս չափանիշներին, ուրեմն նրանք Երևանի քաղաքապետարանում աշխատելու շատ լավ շանսեր ունեն: Չհաշված, որ եթե խոսում ենք ինչ-ինչ հաշվարկների մասին, պետք է նշել , որ Քաղաքապետարանում պաշտոն զբաղեցնող աշխատակիցների զգալի մասը համայնքային ծառայողներն են, որոնք պաշտոններ ստանում են մրցութային կարգով այս պարագայում անտեղի է խոսել նախասիրությունների մասին:

Մեր մնացած հարցերին Հակոբ Կարապետյանը հրաժարվեց պատասխանել, օրը ոչ աշխատանքային է, առաջարկեց թողնել երկուշաբթի:

Հիշեցնենք՝ մամուլն այսօր գրել էր՝ Հայկ Մարությանը 40 տոկոսով «սպիտակեցնել է» աշխատակազմը: Նրա հայտնվելուց հետո մեկ տարուց պակաս ժամանակահատվածում քաղաքապետարանի աշխատակազմը նորացվել է՝ նոր դեմքեր են հայտնվել գրեթե բոլոր վարչություններում: Նրանք բոլորովին այլ կարգավիճակ ունեն՝ ինչպես վայել է «սպիտակ» աշխատողներին՝ սիրված ու գնահատված են, շատ բարձր պարգևավճարներ են ստանում և առհասարակ՝ յուրային են ու դրության տերը:

Աղբյուր` Փաստինֆո