Փաստ ինֆո

Անհատ ձեռնարկատեր չհանդիսացող տաքսու վարորդները հուլիսի 1-ից ազատվում են բոլոր տեսակի վճարներից։ Այս մասին այսօր Գյումրիում «Իմ քայլը Շիրակի մարզի» գործարար համաժողովի ժամանակ ասաց ՀՀ վարչապետ Նիկոլ Փաշինյանը։ Նա ընդգծեց, որ իշխանության որդեգրած տնտեսական քաղաքականությունը որոշակի սոցիալական ուղղվածություն ունի. «Հուլիսի 1-ից տաքսու վարորդները Երևան քաղաքում 12 հազ դրամ, իսկ մարզերում 8 հազ դրամ ամսական վճարումներ անելու պարտավորություններից ազատվում են», - ասաց վարչապետը։

Նա նկատեց, որ քաղաքացիների համար ընձեռում են բազմաթիվ հնարավորություններ՝ գործունեություն ծավալել առանց հարկային պարտավորությունները կատարելու։ Վարչապետի խոսքով «Հարկային օրենսգրքի» փոփոխություններով հնարավորություններ են ստեղծել նաև տնայնագործական գինիների և թրմօղիների արտադրությամբ զբաղվող քաղաքացիներին. «Մինչ այժմ նրանք շրջանառության հարկի դաշտում աշխատելու հնարավորություն չունեին, բայց ՀՕ-ում փոփոխություններ անելուց հետո, այժմ ունեն»։

Նիկոլ Փաշինյանն անդրադարձավ նաև Տավուշի մարզում ապօրինի անտառահատումների դեմ պայքարի շրջանակներում բնակչության դժգոհություններին՝ ասելով, որ իր համար զարմանալի է, երբ կարծիքներ են հնչում, որ դա ինչ-որ մարդկանց հացի փող է. «Կներեք, սա ինձ համար անհասկանալի մոտեցում է։

Ներողություն եմ խնդրում, յուրաքանչյուր կոռուպցիոների վերցրած կաշառքն իր ապրուստի փողն է, գողություն անողի ապրուստի փողն իր գողոնն է, ավազակություն անողինը՝ իր ավազակությունն է։ Մենք այսպիսի կոմպրոմիսների չենք գնալու, որովհետև կարծում ենք, որ ստեղծում ենք բավարար դաշտ, որ ՀՀ քաղաքացիները ստեղծարար աշխատանքով իրենց հացը վաստակելու հնարավորություն ունենան», - ասաց Նիկոլ Փաշինյանը։

Աղբյուր` Փաստինֆո