Փաստ ինֆո

Այսօր Նոր Արեշում տեղի ունեցած ողբերգական հետեւանքով դանակահարության մեջ կասկածվողը հոգեկան հիվանդ է։ Այս մասին «Փաստինֆո»-ն տեղեկանում է ոստիկանության կայքէջից։

Ավելի վաղ «Փաստինֆո»-ն հայտել էր, որ 27-ամյա տղան դանակի հարվածներ է հասցրել հորն ու մորը, այնուհետև վնասել ինքն իրեն։ Նրա հասցրած դանակի հարվածների հետևանքով մայրը մահացել է, իսկ հայրն այժմ գտնվում է Էրեբունի բժշկական կենտրոնում։

Ոստիկանության հաղորդմամբ հուլիսի 19-ին՝ ժամը 03։30-ի սահմաններում ԱԻՆ «911» ծառայություն է զանգահարել Նոր Արեշի 16-րդ փողոցի մի բնակիչ և հայտնել, թե տղան հոգեկան հիվանդ է. դանակը վերցրել և մտել է սենյակ ու վախենում է, որ իրեն կվնասի։

Ավելի ուշ «Էրեբունի» բժշկական կենտրոնից հաղորդում է ստացվել, որ «կրծքավանդակի կտրած-ծակած վերքեր» ախտորոշմամբ շտապօգնության խումբը բուժօգնության է տեղափոխել Նոր Արեշի 16-րդ փողոցի բնակիչ, 59-ամյա մի տղամարդու: Նա հայտնել է, որ տանը տեղի է ունեցել դանակահարություն:

Եվս հինգ րոպե անց նույն բժշկական կենտրոնից նոր հաղորդում է ստացվել. «կրծքավանդակի կտրած-ծակած վերքեր» ախտորոշմամբ, նույն հասցեից, իրենց մոտ է տեղափոխվել 61-ամյա կնոջ դիակ:

Ոստիկանության Էրեբունու բաժնից մեկնած օպերատիվ խումբը պարզել է, որ տղան խոհանոցային դանակով հարվածել և մարմնական վնասվածքներ է պատճառել մորն ու հորը, հետո վնասել է ինքն իրեն և դիմել փախուստի: Ոստիկաններին հաջողվել է դեպքի վայրին հարակից տարածքում հայտնաբերել տղային և ժամը 04.55-ին նրան տեղափոխել հիվանդանոց, որտեղ ախտորոշվել է «պարանոցի կտրած-ծակած վերքեր։ Քննիչի որոշմամբ տղան որպես կասկածյալ ձերբակալվել է։

Դեպքի առթիվ հարուցվել է քրեական գործ ՀՀ քրեական օրենսգրքի 34-104-րդ հոդվածներով։

Աղբյուր` Փաստինֆո