Փաստ ինֆո

Բարձրագույն դատական խորհուրդն այսօր հանդիպելու է Երեւանի ընդհանուր իրավասության դատարանի դատավոր Դավիթ Գրիգորյանի հետ։ «Փաստինֆո»-ի հաղորդմամբ՝ այս մասին լրագրողների հետ զրույցում քիչ առաջ ասաց ԲԴԽ անդամ Գրիգոր Բեքմեզյանը։

Վերջինս նշեց, որ հանդիպումն իրենք են նախաձեռնել, եւ միայն դրանից հետո դիրքորոշում կհայտնեն դատավորի աշխատասենյակի խուզարկության վերաբերյալ․ «Մենք հանդիպելու ենք, խոսենք, հասկանանք, թե այս գործողությունները որքանով են նրա՝ որպես դատավորի գործունեությանը, անկախությանը խոչընդոտել։ Այսօր առավոտյան զանգել ենք իրեն եւ խնդրել, որ հանդիպենք»։

Բեքմեզյանն ասաց, որ գործի վերաբերյալ որեւէ նյութ չեն ստացել, իրենք պարզապես ծանուցվել են, որ դատավորի մոտ պետք է կատարեն քննչական գործողություններ։ Մեր այն հարցին, թե ԲԴԽ-ն կոնկրետ երբ է ծանուցվել, Գրիգոր Բեքմեզյանը պատասխանեց, որ նախապես, մինչ խուզարկությունը։

Հարցին՝ իր կարծիքով՝ պե՞տք է դատավորին էլ նախապես տեղյակ պահեին խուզարկության վերաբերյալ, ինչպես ԲԴԽ-ին են տեղյակ պահել, Բեքմեզյանը պատասխանեց, որ ըստ օրենքի՝ եթե դատավորը մասնակցում է դատավարական գործողությունների, ապա մեկ օր առաջ նրան պետք է տեղյակ պահեն․ «Մեզ որ տեղյակ են պահել, դատավորի մասնակցության մասին ոչինչ չեն ասել։ Այսինքն՝ ըստ մեր ծանուցման՝ քննչական գործողություններ պետք է լինեին նրա աշխատասենյակում»։

Հարցին՝ արդյո՞ք դատավորի խուզարկության եւ Ռոբերտ Քոչարյանի գործի միջեւ կապ տեսնում է թե ոչ , Գրիգոր Բեքմեզյանը պատասխանեց․ «Մենք դեռեւս ոչ մի գործի հետ կապված կապ չենք տեսնում»։

Հեղինակ` Միլենա Խաչիկյան